Хотл балһснд автопробег болв
Эн жилин арвн сарин эргцд танһчин хаалһст тавн зун тәвн зурһан зеткртә йовдл учрв, энүнә ашт найн хойр күн әмнәсн хаһцв, тер тоод долан бичкдүд. Нәәмн зун дөчн тавн күн шавтв. Зеткртә йовдлын ашт әмнәсн хаһцсн улсин санлд нерәдгдсн автопробег болв. Энүнд автошколын, ГИББД-н көдләчнр, дөрвдгч школын уйн наста инспектормуд орлцв. Машид Элст балһсна цутхлнг уульнцар гүүлгв.
Өрүн арвн часла Сити-чессин машид зогсдг бәәрнд эн керг-үүлдврт орлцх саната улс машиһарн ирцхәв. Тогт сн авьясар автомобилистнрин цугәрәсән организацин элчнр бүкл колонн бүрдәв. Машин болһнд хаалһд даавртаһар йовхин тускар баннермуд өлгәтә бәәнә. Һурвн жилдән эдн ГИБДД-н инспектормудла хамдан эн төрт олн улс оньган өгхин туст үүлджәнә. Иим керг-үүлдврин һол күцлнь — хаалһд зеткртә йовдлмудас көлтә шав авдг болн әмнәсн хаһцдг улсин то барһрулһн болжана.
КРО ВОА-н ахлачин дарук Ольга Габунован келсәр, иим керг-үүлдвр әмтнд дөн болх зөвтә. Ода эн туст күн бәәдл тогтв. Иим керг жолачнрт дәкәд нег тодлвр болх.
Хаалһд шавтад эс гиж әмнәсн хаһцсн улсин тускар дәкәд нег санад тодлхин тускар хаалһд йовдг улст дуудвр кегдв. Машидын колонн хаалһд зеткртә йовдлмуд учрдг хамгин әәмшгтә һазрар йовв. Эннь Ленина нертә уульнцин төрлһнә герин өөр бәәх хаалһ болн негдгч микрорайона эргүлин хаалһ. Эдниг үзссн машидын жолачнр коллнна улсиг тосад докья өгв. Керг-үүлдврин йовудт хаалһд учрдг зеткртә йовдлмудын тускар статистикин то-диглә таньлдулв.
ГИБДД-н инспектор Василий Кекеевин келсәр, эрүл-менд харлһна нарта-делкән организацин то-дигәр хаалһд нег сай күн әмнәсн хаһцна. Мана танһчд зун күн әмнәсн хаһцна. Иим улсин санл тодлгч керг-үүлдврмүд жил болһн болна. Эн өдрлә саглулгч керг-үүлдврмүд бүрдәгднә.
Тер мет хаалһд учрдг зеткртә йовдлмудын тускар Элст балһсна улст хаалһин уйн наста инспектормуд келж өгв. Хаалһд зеткртә йовдлмудас көлтә әмнәсн хаһцсн улсин санл тодлалд, хотл балһсна дөрвдгч школын сурһульчнр хөрн цаһан шар тенгрт һарһж йовулв. танһчин хаалһст хөрн бичкдүд зеткртә йовудлын ашт әмнәсн хаһцсмн.
Батан Санжирма, Мятежный Максим
