Көтчнрә района Сарпа селәнә бичкдүд школд орх аль угай?

Сурһулин шин жил эклхлә Көтчнрә района Сарпа селәнә бичкдүд школд орх аль угай? Эндр өдр эн сурвр бәәрн улсиг үүмүлжәнә. Мөнгн уга болад тосхлтын көдлмш зогсв. Эн школ эдлврт орулхин төлә 40 сай арслнг кергтә.

Көтчнрә района Сарпа селәнә улс хойр давхрта шин школыг кесг жилдән күләжәнә. Эн школын тосхлт 2007 жилд эклсн билә. Давсн жилин хавраһар тосхлтын көдлмш зогсв. Эндр өдр эн школын тосхлтд һар 65 сай арслн һарһв. Школын тосхлтыг дуусхн төләд Тосхачнрт дәкәд мөнгн кергтә болжана.

Көтчнрә района селәнә мунициапльн бүрдәцин ахлач Владимир Куршаев келсәр дәкәд 40 сай арслн кергтә болжана. Эндр өдр маднд күн дөн болшго эврә арһарн эн школыг тосхж чадшговидн.

Жил болһн һаха сарин нег шинлә школын бичкдүд хуучн школд сурһуль сурхар йовна. Хуучн школ 1957 жил тосхгдсн билә. Өдгә цагт энд эрс, пол нуурад унжана. Эн сурһлин шин жилд бидн шин школд орж чадшговидн гиж ах классин сурһульчнр Жирһл Баташова болн Дулахн Бадмаева келв. Тавдгч классин сурһульчнр Ганга Мутулова болн Альма Мацакова жил болһн тавн темдгәр суруһлән чиләнә. Дәкәд болхлаг Эдн Олн зүсн марһасин дииләчнр. Асхн болхн школын өөр наадхларн у сәәхн хорас үзж чадна.

Тосхгджах шин школ маднд таасгдна, энүнд бииһин хора бәәнә. Талдан хорас ик, болн сарул — гиж бичкдүд маднд келв. Школын директор Галина Максимова химин предметар дамшлтын кичәл давулна туст эрк биш кергтә таал уга болж һарв. Дәкәд болхла хуучн гер нууран унх әәмшг бәәнә. Тегәд иим нәрн бәәдлд бичкдүд сурһуль дасна.

Дәкәд нег хурц төр селәнд бичкдүдин сад уга болжана. Олн үртә Айса Азаеван келсәр бичкдүдән хәләхн төлә көдлмшәсн һарув. Тер мет эн селәнә олн эк эцкнриг көвүд күүкдән школд белдх төр икәр үүмүлжәнә.

Тегәд шин школ тосхгдхла деер зарлгдсн цуг төрмүд хаһлгдхн. Эн эдл ахун һардачнр шин школд кесг баг сәкх зурата. Юнгад гихлә бичкдүдин садт йовх күүкд көвүдиг жил ирвәс өсәд йовна.

Ээнән Ольга, Жамбин Дмитрий