Көтчнрә район далн тавн жилин өөнән темдглв
Ода талдан төрмүдин тускар. Көтчнрә район далн тавн жилин ончта өөнән темдглв. һучн нәәмдгч жиләс авн танһчин картд район темдглж бичгдв. Эн цагин эргцд Көтчнрә район танһчин агропромышленн делгрлтин цутхлнг болв. Эндр өдр күртл района улс өвкнриннь уул авьяс-зангшал әрүн кевәр хадһлж, иргч үйнрт үлдәж медүлжәнә. Энүнә тускар района бәәрн әмтн болн гиичнр байрт келв. Района байрт мана зәнгч Ээнән Ольга бас орлцв.
Көтчнрә район Ергеня уулын белд бәәнә. Энүнд хавр болһн теегт бамб цецгүд цецгәрнә, олна малын ик сүргүд тег дүүргнә, бәәрн района әмтн күч-көлсч болн седвәря улс. Энд энгдән хальмг келәр әмтн хоорндан күүнднә, домбрин ай күнкннә, хальмг улсин ут дун чееж сергәнә. Байрин төлә тосхсн хальмгин ишкә гермүдт хальмг улсин уул авьяс-зангшалла өөрхн таньлдж болв. Тугтн селәнә бәәрн күүкд күн Светлана Кикеева байрт орлцосн улсиг чигәһәр тоов. Энүг яһж белдхин тускар Светлана бичкне цагасн авн меднә.
Көтчнрә района улсиг төрскн келән болн сойлан әрүнәр хадһлдг улс гиж келж болх. Бичкдүдиг нилх цагаснь авн өвкнрин уул зангшал хадһлж бәрхинь дасхна. Района көвүд-күүкд олн-зүсн марһаст орлцад, диилвр бәрнә, фестиваль — форумд шунмһаһар орлцна.
Төрскән харсгч дәәнд көтчнрә салдснр баатр-зөрмг кевәр дәәлдәд, төрскн харсж авсмн. Районас танһчин нертә олн улс һарв. Эннь дәәнә ветеран, социалистическ күч-көлснә герой, әрә Гакович Менкенов, сойлын министр Алексей Бадмае Хальмгин түрүн профессор Бата Бадмаев. Талдан чигн эрдмин элчнр района нериг холд туурулсмн. Байрин йовудт күч-көлснә ветеранмудыг күндлж йөрәв. Эдн района цецгәрлтд болн делгрлтд ик тәвцән орулсн улс болжана. Теднә тоод кесг жилдән бухгалтер болж көдлж йовсн Жигмид Хулхачиевиг темдглх кергтә.
Эн саамд района ончта өөнин байрт нүүрлгч көдләчнр болн эдл-ахус олн-зүсн ачлврмудар ачлгдв, күндтә нер зүүв, күндлһнә һашгудар мөрәлгдв, үнтә белгүдәр ачлгдв. Танһчин толһач Алексйе Орлов йөрәлин үг келәд, район цаарандан делгрлт авчана, шин тосхлтс күцәгджәнә, жирһл сән талнь ясржана гиж темдглв. Селән һазрт бәхәсн әмтнд бәцин таал бүрдәгджәнә, жирһл бәәхтә болжана.
Танһчин толһач Алексей Орловин келсәр, көтчнрә райолна әмтн өвкнрин уул авяьс әрүн кевәр хадһлжана, хальмгин зангшалыг хадһлж дорас өсж йовх үйнрт медүлж өгчәнә.
Далн танв жилдән Көтчнрә район агропромышленн комплексин делгрлтин йоста цутхлнг болв. Хальмгин тохма мал сән чинрәрн хол һазрт нерән туурулв. Көтчнрә района малын махыг ик холд дурлж хулдж авна. Районд малчнрин болн механизатормудын кесг өрк-бүлмүд өсж, ик дамшлт хоршаж көдлжәнә. Ода болхла баһчудын цаг ирв. Эдн эврәннь ах үйнриннь тууж болн зангшал цаарандан делгрүлжәнә.
