Комсомольский селәнд усна сурвлжн тосхгджана

Хар һазра района Комсомольский селәнд уудг усна сурвлжна тосхлт цаарандан кегджәнә. Эн көдлмш давсн жилин июнь сард эклсмн. Тавн сарин эргцд тосхачнр зурһан дуунад сурвлж татв. Эн жилин декабрь сар күртл дәкәд арвн дуунад сурвлж татх зура бәәнә. Иим көдлмш селәнә социальн делгрлтин федеральн шишлнг программар кегджәнә.

Ода уудг усн гермүдт ирсн хөөн, зура темдглж авч болх. Магамаевихна өрк-бүл болхла һаруд тәрх саната. Умар Саидовичин келсәр, герин ард бичкн һазрин участк бәәнә. Энүнд тарвс тәрж болх. Багцин культур элстә һазрт сәәнәр урһна. Тарвсиг невчк усар услхла сән урһц хураж авч болх.

Умар Магамаевин келсәр, тер мет һарудт эврә хаяр, помидор тәрх санан бәәнә. Усн бәәхлә темс урһаж болх. Зуг усн кергтә.

Тер мет ода усн Северная уульнцин гермүдәс нань талдан чигн уульнцд ирв. Давсн жилд тавн сарин эргцд района цутхлнг селәнд зурһан дуунад усна сурвлжн тосхгдв. Тер мет зун жирн кубическ метр усн ордг шин ик сав углж тәвгдв. Давсн жилд Комсомольский селәнд усна сурвлж шинрүлж яслһна төсв селәнә социальн делгрлтин федеральн шишлнг программд орснас иштә иим ик көдлмш кегдв. Энүнә төлә танһчин болн бәәрн бюджетмудас йилһж өгсн хөрн негн сай арслнг мөнгн девснг девснгәр олзлгджана.

Комсомольск селәнә муниципальн бүрдәчин толһач Санл Мукубеновин келсәр, ода цуг көдлмшин түрүн девснг күцәгдв. Цааранднь хойрдгч девснгин көдлмш эклжәнә.

Эн жилин эргцд дәкәд арвн дуунад усна сурвлжн татгдхмн. Тосхлтын организацин участкин ахлач Владимир Лиджиевин келсәр, темдглсн зура күцәхд боомтг уга. Ода цуг көдлмш гүргүдән орчкв. Темдглсн зураһар цөн сар болад усна сурвлж шинрүлж яслһна хойрдгч девснгин көдлмш төгсх.

Участкин ахлач Владимир Лиджиевин келсәр, ода деерән темглсн зура күцәгджәнә. Энүнә төлә цуг кергтә материал бәәнә, көдләчнр чидлән нөөлго көдлжәнә.

Тер мет эн көдлмшт района коммунальн церглт шунмһаһар орлцжана. Энүнә директор Николай Бадаевин келсәр, бәәрн улсин эрлһәр усна сурвлжн гермүдт татгдна. Дәкәд болхла, гермүдин эздүд шишлнг худг белдх зөвтә, счетчикүд тәвх неквр бәәнә. Коммнулаьн церглтин директор Никоалй Бадаевин келсәр, ода иим йирн эрлһн бәәрн улсас орж ирв. Эднд усна сурвлжн орулгдх. Худгт счетчик тәвәд, энүг чикәр углх кергтә болжана.

Иргч хойр минһн арвн дөрвдгч жилд Комсомольск селәнд усна сурвлж шинүрлһнә көдлмшиг цаарандан күцәх зура селәнә муниципальн бүрдәц темдглжәнә. Тер мет Әмтәхн артезиан нертә усна булгиг болн жирдгч жилмүдт тосхсн цеврлһнә сооруженьсиг капитальн кевәр ясх санан бәәнә. Энүнә төлә шишлнг программ орх кергтә.

Комсомольский селәнә толһач Санл Мукубеновин келсәр, ода цуг кергтә проектн документац белн болв. Тегәд иргчдән нег шишлнг программд орх нәәлвр бәәнә.

Мукабеновин келсәр, тиигхлә района цутхлнг селәнә улсиг цевр сән чинртә уудг усар тетклһнә төр күцц хаһлгдх.

Чучян Валентина, Бадмаран Владислав