Арвн дөрвн чернобыльцнр жилишн сертификат авв

Чернобыльск атомн станцин аюлд орлцсн арвн дөрвн күүнд жилишн сертификат бәрүлж өггдв. Эднд байрин бәәдлд Элст балһсна мэрийд иим документ өггдв. Дәкәд нег тодлад келхлә, Украина балһснд хөрн долан жил хооран ик зеткртә аюл учсрмн. Тиигхд бәәрн улст дөн күргхин төлә цуг орн-нутгас кесг минһн күрн ирв. Хальмг танһчас тенд зурһан зун күн көдлв. Ода күртл радиац эжго аһун йиртмжд му нилчән күргжәнә. Чернобылин аюлд орцлсн улсиг государств дөннжәнә. Тер мет эднә өрк-бүлмүдт бас дөн күрггднә.

Найн зурһадгч жилин апрелин хөрн зурһанд Чернобыльск атомн станцд ик зеткртә аюл болсмн. Күмн әмтнә туужд хамгин ик аюл учрв, кесг минһн күн әмнәсн хаһцв. Энүнә ашнь ода күртл му үлмәһән күргжәнә. Бидн баатрмуд биш. Бидн эврәннь көдлмшән күцәләвидн гиж Чернорбыльск атомн стацнд учрсн аюлын хөөн тенд одад көдлсн улс келнә. Теднә негнь Элст балһсна бәәрн күн Борис Мучкаев. Баатр-зөрмг кеәвр аюлд орлцснд правительствен ачлврар ачлгдв. Зуг ода жилишн сертификатар бәәдг гертә болв.

Чернобыльск атомн станцд көдлсн Брис Мучкаевин келсәр, арвн негн жилдән бәәдг гер күләж. Ода эврә гертә болв. Ик байрта бәәнә, седкл төвкнв.

Чернобыльск АЭС-т көдлсн арвн дөрвн күн болн эднә элгн-саднь жилишн сертификат авв. Эднд сертификат байрин бәәдлд Элст балһсна мэрйин сүүрин залд бәрүлж өггдв.

Чернобыльцнрин ниицәнә Элст балһсна организацин ахлач Николай Ермолаевин келсәр, ода чеерүдт хөрн тавн күн зогсжана. Жил төгстл дәкәд жилишн сертификат өгх зура бәәнә. Зәрм әмтн чеерүд угаһар гермүд өгчәнә гиж келнә. Эннь худл. Чеерүд чанһ кевәр бүрткжәнә. Нег списк Москвад бәәнә, негинь прокуратурт өглә, дәкәд нег списк танһчин тосхлытн министерствд бәәнә. Чеерүд угаһар гер өггдшго.

Эндр өдрт Элст балһснд зун далн һурвн чернобыльцнр инвалидмуд бәәнә. Болн һучн нәәмн күн аюлын үлдл уга келһнд көдлсмн. Эднә төлә федеральн закаһар олн-зүсн льгот бәәнә. Эрүл-мендән геесн улст дөнцл мөнг өгхин төлә иим льгот эднд һарһж өгв.

Элст балһсна мэрйин толһачин дарук Галина Васькина келсәр, Элст балһсна администрац болн һардачнр чернобыльцнрт ик ханлтан өргжәнә. Найн зурһадгч жилд эдн әмән әрвллго ик аюлд орад, күмн әмтиг харсж авсмн. Эднд олн-үзсн льгот өггднә. Тер тоод санаторн-күрортн эмнүлһнд одна, медицинск туслмж күрглһнд льгот бәәнә. Хамгин хурц төрнь — бәәдг герәр тетклһнә. Сүл жилмүдт эн төр халһгджана.

Чернобыльд учрсн ик зеткртә аюлын хөөн хөрн долан жилд давв. Энүнд кесг минһн күн әмнәсн хаһцв, икәр шавтв, эрүл-мендән геев. Радиацас көлтә эднәс далнь процентнь өнгрв. Чернобылин аюлд орлцсн улсиг государствин халхас дөннлһн эднд ик ханлтан өргжәх темдг болжана.

Елена Алексенко, Котина Валерий