Комендантск часин туск заканд сольвр орулгдв
Сөөднь хәләвр уга йовна. Бичкдүд зака эвдсн йовдлмудын то сүл цагт өсв гиж МВД-н танһчин заллтин насни дигт күрәд уга бичкдүдин әнгин көдләчнр темдглв. Сүл йисн сарин эргцд иим зун хөрн йовдл илткгдв. Энүнәс һучн дөврн йовдл сөөһәр учрв. Арвн нәәмн нас күрәд уга бичкдүд комендантск часин туск зака эвдснь МВД-н көдләчнр танһчин заканд орулсн сольврла залһлдата гиж тоолжана. Хойр минһн арвн хойрдгч жилин ноябрь сард батлж авсн танһчин административн зака эвдсн йовдлмудын туск заканд сөөһәр һаза йовсн бичкдүдин тускар эк-эцкнр даавр уга болв. Ода протокол бичхд күнд болжана.
Насни дигт күрәд уга бичкдүдин төлә комендантск час Әрәсән цуг регионмудт хойр минһн арсн негдгч жиләс авн орулгдсмн. Хаврин зунын кемд иим кем хөрн һурвн часас авн эклнә. Намрин үвлин кемд болхла хөрн хойр часас авн эклх зөвтә. Эн цагин хөөн арвн нәәмн нас күрәд уга көвүд-күүкд эк-эцк угаһар һаза эс гиж олна һазрт бәәх зөв уга. Урднь иим зака эвдсн эк-эцкнр административн засгла харһулгддг бәәсмн. Шин закаһар болхла эк-эцкнр эднә бичкдүд сөөднь альд йовсн тускар даавр уга болв. Зөв-йосна органмудын көдләчнрин тоолврар, заканд орулдгсн иим сольвр эднә көдлмшт боомтг учражана. Тегәд чигн насни дигт күрәд уга бичкдүд дунд зака эвдсн йовдлмудын то өсв.
Насни дигт күрәд уга бичкдүдин әнгин ах ах инспектор Адьян Бадмаевин келсәр, сүл арвн сарин эргцд насни дигт күрәд уга бичкдүд дунд зака эвдсн йовдлмудын то хойр процентд өсв. Эн кемжән дегд ик эс болв чигн, жилин чилгч күртл өсх бәәдлтә.
Хойр минһн йисдгч жилд ноябрин арвн нәәмнд батлж авсн Хальмг танһчин административн зака эвдсн йовдлмудын туск закана һучдгч статья насни дигт күрәд уга көвүд-күүкдт тархагджала.
Насни дигт күрәд уга бичкдүдин әнгин ахлачин үүл даажах Валерий Сухуровин келсәр, Әрәсән закан насни дигт күрәд уга хотл балһсна бичкдүдин туст үүлддг бәәсмн, талдан көвүд-күүкд тер тоод дунд эрдмин сурһулин баһчуд эн закаһар засгла харһулгдсн уга. Кемр оютнриг бәрж авхла эднә эк-эцкнрин утскар протокол бичдг арһ уга бәәсмн. Зәрм эк-эцкнр талдан регионмудт билә. Эдниг обшежитьд күргдг бәәж.
Хойр минһн арвн хйордгч жилин ноябрин арвн йиснд батлж авсн административн зака эвдсн йовдлмудын туск шин закаһар сөөднь олна һазрт насни дигт күрәд уга бичкдүд бәәснд цол даажах улс эс гиж юридическ улс дааврта болв. Шин заканд эк-эцкнрин утскар келгджәхш. Эн туст зөв-йосна органмудын көдләчнрт Әрәсән административн зака эвдсн йовдлмудын туск кодекс нөкд болжана. Эк-эцкнр бичкдүдт сурһмж өглһнә туст эврәннь даавран эс күцәсн цагт зун арслнгас авн тавн зун арслнг күртл административн ял өгхин тускар кодекст келгджәнә.
Хальмгин прокурорин ах нөкд Эльза Батыреван келсәр, иим эк-эцкнр эврәннь даавран эс күцәжәхинь протокол бичсн зөв-йосна көдләч иткүлх зөвтә бәәсмн.
Эн төрәр эк-эцкнрин ухан-тоолвра әдл биш. Эн күүнә келсәр, эк-эцкнр эврәннь үрдүдән хәләж бүрткх зөвтә. Эс хәләсн эк-эцкнриг ялд унһах кергтә. Эк-эцкнр бичкдүдән эврән хәләх зөвтә, ял авхла сән болх гиж эн келнә. Засгла харһулх керг уга, цәәлһврин көдмш кех кергтә гиж эн күн санжана.
Эк-эцкнрин административн дааврин туск заканд сольвр орулсн хөөн бәәдл сольгдв. Зөв-йосна органмудын көдләчнрин тоолврар, иим сольвр му нилчән хальдав. Энүнд статистикин то-диг ил герч болжана. Сүл арвн хонгт сөөһәр зун шаху көвүд-күүкд бәргдв.
Елена Алексенко, Эрнжәнә Эрднь
