Католическ шажнд шүттг улс удл уга Христосин төрж мендлсн өдр темдглх
Католическ шажнд шүттг улс удл уга Христосин төрж мендлсн өдр темдглх. Декабрин хөрн дөрвнд асхлад тенгрт Рождественск од һархинь моһлцг һазр деер күсдундур жува күн күләжәнә. Католическ Рождествон байриг хальмг танһчд бас тосх. Өдгәцагт мана регионд зун күн католическ шажнд шүтжәнә.
Эн өвәрц өрк-бүлд зурһан көвүшлж авсн бичкдүд өсжәнә. Эн көвүд-күүкд цугтан инвалид. Эдниг эк-эцкнь хайсн болжана. Италин ар үзгт бәәх бичкн Дальзано балһсна бәәрн күүкд күн Альберта де Клара сүл жилмүдт эн бичкдүдт хамгин энкр күн болв. Бичкн көвүд-күүкд ода ни-негн өрк-бүлд өсжәнә, хол орн-нутгин авьяс шингәж авчана. Рождествон байрин өмн өргнәсүл Адвент сард Тоня, Саглр, Света, Ольга болн эднүр дару-дарунь ирдг Анна эврәннь цутхлнгдан елкин олн-зүсн кеерүл белджәнә, эврәннь һарарн белгүд кежәнә. Эн вертепиг эдн эврәннь гертән ик дуран өгч кеж. Энүг библейск туужла ирлцүлж кев. Альберта де Клара келсәр, рождествон байр күртл долан хонг үлдхлә, нилхин саатулнг белдж. Энд Мария Иосиф бәәнә. Зуг Иисусиг ода деерән бултулх кергтә. Христосин төрж мендлсн өдриг тенкән уга гидгәр күләжәнәвидн.
Католическ литәр Рождество байр хамгин сергмжтә байр гиж күндлгднә. Хамгин икәр энүнд бичкдүд дурта. Энүнә тускар маднд Альбертан нөкднр — Тоскана ирсн оютн Текла Влади болн Рим балһснас ирсн орчулач Элиза Ди Марко тодрхаһар келж өгв. Байрин өдрмүдт бичкдүд эрк биш белгүд авна. Тер мет белгүд эврәннь һарарн кехдән дурта. Элиза Ди Марко болн Текла Вади келсәр, католикүд чонжд ода мөргнә. Итальд эн байр ик чинр зүүнә. Йир сергмжтә байр, седкл байрлна. Нег үлү бичкдүд бәәх өрк-бүлмүд эн байр онц чинртә болна гиж гиичнр келнә.
Декабрин хөрн дөрвнд Элст балһснд Франциск Асизсскийн нертәприходт ик рождественск мөргүл болх. Энүнә хөөн католикүд ширә эргәд сууһад, нәр-нааднд орлцад, ду дуулад, белгүд белглх. Эднд иим цаг хамгин байрта кем болна.
Хавтхна Элла, Жамбин Дмитрий
