Каратэн марһан Элст болв
Элстин спортын бәәшнгд синкиокусинкай эв-арһар бөк бәрлдлһнә марһан дәәчин эрдмин йоста байрт хүврв. Энүнд Элст балһсна, Лаганск болн Хар Һазра райодын спортменмүд ирж дөрлдв. Нарта-делкән классин мастер Марина Анфимова эн спортын танһчин федерацин һардач болжана. Энүнә тоолврар, марһанд орлцсн бичкдүдт эннь йоста шүүвр болв. Иргчдән иим дамшлт эднд сән нилчән күргх.
Синкиокусинкай нертә эв-арһ дәәчин чинртә эв-арһ болжана. Иим эв-арһар цуг нарта-делкәд хамгин олн күн соньмсжана. Иим эв-арһ эгл болсн деерән йир олз-туста болжана. Цуг эн чинриг танһчин командн марһана орлцачнр үзүлв. Иим дөрлдә бүрдәж давулсн Марина Анфимован тоолврар, иим марһан уйн наста бөкнрт эврәннь командын ханьд сән дамшлт хоршахд сән нилчән күргх.
Нарта-делкән классин спортын мастер Марина Анфимован келсәр, мана каратэ киокусинкай организацин программар иим марһан бүрдәж давулгдв. Жирлин күнд бәәдлд туссн бичкддүин төлә иим керг-үүлдвр кегджәнә. Иим программар түрүн дөрлдән болв. Мана секцд дала шин бичкдүд ирв. Тегәд марһаг командн дөрлдән гиж бүрдәхәр шиидв. Шүүгдсн бичкдүд үүмшгон төләд иим эв-арю шүүж авгдв. Хөөннь эдн эврәннь дамшлтан үзүләд, диилвр бәрж чадх.
Эн спортивн марһанд нәәмн команд дөрлдв. Энүнә хань дөрлдәнә өмн тогтагдв. Командын ханьд танһчин райодын бөкнр орлцв. Элст балһсна уйн наста спортсменк Алиса Мошаева каратэн эв-арһар бөк бәрлдлһнә спортар һурвн жилдән көдлжәнә. Ода куомандын төлә үүмжәнә. Ноолдан эклтл эврәннь нәәж күүкнтәһән белдвр кехәр шиидв.
Алисаг марһанд дөннхин төлә энүнә ээжнь ирв. Келхд, ээжнь күүкиг секцд түрүн болж духалж ирлә.
Ээж Валентина Эвееван келсәр, бичкдүдин тренер йир сән болн дамшлтта күн. Элстин каратэн секцд сурһмжин ик көдлмш кегджәнә. Энүнд Алиса ил герч болжана. Ода күүкн тас талдан болж одв.
Хальмг танһчин дорд үзгин эв-арһар бөк бәрлдлһнә федерацин һардач Владимир Мудаевин тоолврар, мана танһчд синкиокусинкай эв-арһ мана танһчд делглрт авхин төлә Марина Анфимова хамгин сән эв-арһ олж авч. Энүнә дөнгәр мана танһчд иим эв-арһар олн улс сономсх зөвтә.
Хальмг танһчин дорд үзгин эв-арһар бөк бәрлдлһнә федерацин һардач Владимир Мудаевин келсәр, мана танһчд Марина Анфимова каратэн эв-арһар бөк бәрлдлһнд хамгин сән күцәмж бәрсн спортсмен. Кесг дам Европин чемпионк, нарта-делкән кубокин призер. Бичкдүдт сән үлгүр-үзмж болжана. Энүнәс үлгүр авсн көвдү-күүкд өсхләрн әрәсән, Европин болн нарта-делкән марһаст сән үзмж бәрх гиж нәәлжәнә.
Специалистнрин тоолврар, иим спорт чанһ-чиирг болхд сән нилчән күргнә. Эннь зуг дәәчин эрдм биш. Иим спорт һарар ноолдлһна йоста ном болн оюни ухан-санан болна. Ииим эв-ар шүүж авсн әмтн оюни ухан-санаһан батрулна, цогц-махмудан чанһрулна. Ода уйн наста бөкнр зуг түрүн ишкдл кежәнә.
Харлун Бадма, Очра Сергей
