Түүмр унтралһна церглтин көдләчнрин марһан болв

Әәмшгтә бәәдлиг уга кев. МЧС-т хамгин сән газас болн утанас харсачин болн иим аюлас гетлж авлһан хамгин сән звенон марһана танһчин девснг болв. Иим нер зүүхин төлә танһчин хамгин сән түүмр унтралһна әнгиг көдләчнр дөрлдв. Марһанд ут-тоодан зурһан команд орлцв. Эдн гүн медрлән болн дамшлтан медүлв. Марһана ашар ддилчәнр Өмн үзгин федеральн округин дөрлдәнд Хальмг танһчин нер харсх.

Шишлнг давшурар дөрвдгч давхрт һархд, дәәчин чидлмүд белдж авлһнд болн олн-зүсн боомтг давж һархд амр биш. Иим дасхл кехин төлә түүмр унтрадг церглтин көдләч болһн чанһ-чиирг бол ник теслттә болх зөвтә. Түүмр унтрадг церглтин көдлмш нарта-делкәд хамгин әәмшгтә болн жанһрта гиж тоолгдна.

Элст балһсна арвн нәәмдгч түүмр унтралһна әнгин ах пожарный Алексей Сенниковин келсәр, хойр минһн арвдгч жилд иим марһанд орлцж. Мана әнгин ахлач энүг дөрлдәнд йовулж. Иим марһанд олн-зүсн эв-арһ олзлх кергтә, ик медрл үзүлх кергтә болжана.

Газас болн утанас харслһна хамгин сән көдләчин болн иим халхин хамгин сән звенон марһан МЧС-ин һол заллтин эрдмин белдврин зураһар бүрдәж давулгдв. Жил болһн кедг дөрлдән түүмр унтралһна церглтин көдләчнрт дамшлтан өөдлүлхд сән нилчән күргнә, түүмр унтралһна болн әмтн харсж авлһна туст кергтә эрдм хоршахд туслна.

Марһна программар орлцачнр эврәннь халхар гүн медрл үзүлсн деерән, хоршасн дамшлтан үзүлх зөвтә бәәсмн. Түрүләд дөрлдәнә орлцачнр сурврмудт хәрү өгв, эсвин даалһвр күцәв. Энүнә хөөн эдн дасхлан үзүлж, түүмрәс әмт харсж авлһна эрдм жюрин оньгт тусхав.

Марһанд зурһан команд орлцв. Аштнь Элст балһсна негдгч тойгта түүмр унтралһна әнг диилвр бәрв. Газас болн утанас хамгин сән харсачин нер эн энгин көдләч Сергей Бекнеев зүүв.

Элстин негдгч тойгта түүмр унтралһна әнгин көдләч Сергей Бекнеевин келсәр, дежурств болһнд түүмр унтрахин төлә церглтин көдләчнр һарч йовна. Зәрмдән ик әәмшгтә түүмр шатна. Тиигхлә цуг көдләчнр энүг унтрахар көдлнә. Хамгин һол төрнь әмтиг цаглань харсж авх кергтә.

Хойр долан хонг болад танһчин девснгин дииләчнр Өмн үзгин федеральн округин хамгин сән гисн түүмр унтралһна көдләчнрин марһанд Хальмг танһчин нер харсх. Иим дөрлдәнд эдн эврәннь эрдмән болн дамшлтан үзүлх. Марһана товчлгч девснг Ростов на Дону балһснд октябрин чилгчәр болх.

Елена Алексенко, Эрнжәнә Эрднь