Көтчнрә района лагерьт бичкдүд сергмжтәһәр амрчана
Хөрн негн өдртән бичкн көвүд-күүкд сергмжтәһәр амрна. Көтчнрә района “Родничок” бичкдүдин лагерьт сурһульчнр һурвн долан хонгтан амрна. Негдгч селгән — эрүл-мендин болн спортивн зөрүлтин селгән. Далн нәәмн көвүн-күүкн нааран ирәд, цогц-махмудан батрулсн деерән, сул цаган соньн кевәр давулх. Эндр селгәнә сүл өдр көвүд-күүкд эврәннь багшнлаһан энд олж авсн нәәжнрлһән сүл нәәрт орлцх.
Бичкдүдин лагерь Көтчнр селәнәс хөрн тавн дуунад бәәнә. У-өргн тег, канксн ноһана үнр, цевр аһар, серүн салькн. Сурһулин кемд көвүд-күүкд нурһлж класст бәәнә эс гиж компьютерин ард сууна. Энд болхла сурһульчнр церв аһар кииләд, һаза плошадкт цуг керг-үүлдврмүдт орлцна. Тегәд чигн негдгч селгәнә һол зөрүлтнь — спортын болн эрүл-менд батрлуһна төр болжана. Энүнә программд олн-зүсн наад болн марһас орв. Халун өдрмүд болхла бичкдүд бассейнд өөмхдән йир дурта. Тер мет цогц-махмудан батрулхин төлә эднд кеер һарад, цевр аһар кииләд, амрна.
“Родничок” лагерин ах сурһмжлач Цаһан Тюлюмджиеван келсәр, спортивн болн эрүл-менд батрулһна селгән бичкдүдт таасгдна. Энүнд көвүд-күүкд хоорндан ни-негн бәәнә, коллектив батрулна.
Ода бичкдүдин лагерьт бәәрн района көвүд-күүкдлә хамдан Ик-Буурла, Баһ Дөрвдә райодын болн Элст балһсна сурһульчнр амрчана. Эн цагин эргцд эдн үүрләд, нәәжнр болв. Телефона тойгударн болн электронн хайгарн сольлцв. Тегәд зунын хөөн эдн хәрлцәһән цаарандан чигн бәрх саната. Эн көвүнә келсәр, лагерьт амрхд сән таал бәәнә. Таасгджана. Футбол нааднавидн. Асхн болһн дискотек болна. Бас таасгджана. Сәәнәр амрчана. Олн нәәжнр олж авв гиж эн көвүн келв. Хот-хол сән. Вожатнр болн сурһмжлачнр сән. Талдан райодын көвүд-күүкдлә таньлдв. Сән бичкдүдлә нәәж болв.
Бичкдүд сәәнәр амрхин төлә лагерьт цуг таал бүрдәгдв. Герин кинотеатр, спортивн оборудовань хулдж авгдв. Цаглань мөнг йилһж өгснә ашт лагерин герт ясвр кегдв, материальн-техническ ул батрулгдв. Лагерин эргндк аһу кеерүлһнд района күч-көлснә коллективмуд көдлв.
Бичкдүдин лагерин директор Зоя Утаджиеван келсәр, эн жил унтлһан хорас шинрүлж ясгдв. Һурвдчг корпуст хуучн мебелин ормд шин мебель тәвгдв. Корпус болһнд терзд нарнас халхлдг цаасн бәәнә. Арвн негдчг жилд района администрацин толһачин седвәрәр һаза сег кегдв, бичкдүдт йовдг хату девскртә хаалһ тосхгдв.
Ода дәкәд хойр селгәнд сурһульчнр амрх. Эдн эврә зөрүлтәр көдлх. Ода сурһмжлачнр болн вожатнр нааран ирх бичкдүдин нас тоод авч программ белджәнә. Июлин нег шинәс авн энд танһчин цуг райодас сурһульчнр ирж амрх.
Ээнән Ольга, Колдан Церн
