Күндтә ветерана зун насна өөнд нерәдгдсн асхн болв
Эн жил Бадма Манджиевич Лиджи-Горяев дигтә зун нас зүүх бәәсмн. Эн күн танһчин заһсна промышленности ул тогтасн күн болжана. Хальмгин делгрлт ик тәвцән орулв. Лагань балһснд тоомсрта күүнә санлд нерәдгдсн асхн болв.
Санлд үлдсн кезәнк цага тодлврмуд өдгә цагин нег хүвнь болж һарна. Бадма Манджиевич Лиж-Горяевин санлд нерәдгдсн района библиотект болсн санлын асхнд орлцсн улс энүг дәкәд медж иткв. Эгл заһсчин өрк-бүлд өсж боссн көвүн, нәәмн класс болзгаснь урд төгсәһәд, колхозд тооч болж эклж көдлв. Энүнә хөөн заһс бәрдг колхозмудын Хальмгин ниицәнә бүрдәмжин производствин инструктор болж көдлв. Каспийск заһсна завод секлһнд ик тәвцән орулсн күн болжана. Хальмг танһчин заһч бәрлһнә халх делгрүлһнә төлә аһу ик көдлмш күцәсмн. Санлын асхна йовудт эн тоомсрта күүнә тускар цуг әмтн хальмг келәр келв. Эннь бас учрта, юнгад гихлә Бадма Манджиевич эврән бийнь төрскн келән сәәнәр меддг билә.
Мария Убушаевна Наранова Бадма Лиж-Горяевла хамдан нег селәнд бәәсмн. Энүнә тускар бичкн цагин туск тодлврмударн хувалцв.
Бадма Манджиевичла олн-зүсн һазрт болн олн-зүсн цагт хамдан көдлжәсн улс энүнә тускар бүлән үгмүд келж, цаһан седклтә күн билә гиж тодлв. Тәвн йисдгч жилд хальмгуд төрскн һазртан нүүж ирсн хөөн, энүг СССР-ин Деед Хүүвин депутатд суннһж авв. Эннь энүнә күч-көлс өөдән үнлжәх темдг болв. Хөөннь танһчин бәәрн промышленностин министрин, Хальмг АССР-ин Министрмүдин Хүүвин кергүдин һардач болж көдлжәсн цагт Бадма Лиж-Горяевиг кергән сәәнәр меддг болн гүн медрлтә күн гиж хамдан көдлжәсн улс келдг билә. Эврәннь үрдүдтән оньдин сән үлгүр-үзмж болж йовла.
Энүнә күүкн Вера Манджиеван келсәр, дала цаг давж одв. Эцкиннь тускар дала соньн тоот медж авв. Хальмгуд Сиврт бәәсн цагт экцнь олн улст дөн күргсн бәәж. Энүнә тускар минь ода медж авч.
Бадм Манджиевич Лиж-Горяевин нер района библиотект зүүлһх шиидвр авгдв. Санлын асхна хамгин экләцс авн бүлән күр күүндвр болв. Эннь хамгин икәр уйн наста лаганцрт зүркнднь тодлж үлдхнь лавта.
Энкира Дорж-Горяеван келсәр, иим улсас бидн баһчуд үлгүр-үзмж авх зөвтәвидн. Района тоомсрта улсин тускар сәәнәр медх кергтә.
Харлун Бадма, Хулхачин Николай
