Хальмгин хурл Әрәсән марһана хойрдгч девснгд орв
“Россия 1” марһана хойрдгч девснг эклв. Хальмг танһчин цутхлнг хурл Бурхн Багшин Алтн сүм Өмн үзгин федеральн округд нүүрт һарад, полуфиналд дөрлдх зөв авв. Әрәсән архитектурин, туужин болн сойлын найн бумбин тоод орв. Хальмгин хурлын төлә һурвн зун жирн минһн күн дууһан өгв. Дәкәд нег толад келхлә, “Россия 1” телеканл Әрәсән географическ ниицәнлә хамдан иим марһа бүрдәһәд, нарта-делкән туризмин обьект гиж мана орн-нутгар соньмсулхин төлә кежәнә. Ода хойрдгч девснгд шинәс дууһан өгх кергтә.
Олн улс дууһан өглһнд Хальмгин хурл нүүрлгч ормд йовсна тускар "Россия" телеканалд "Доброе утро" нертә сонсхврт зәнглв. Смоленск болн Ханты-Мансийск балһсдла хамдан Элст балһсн бас Москвала шуд эфирт һарв.
Энүнә төлә ГТРК “Калмыкия” хурлын аһуд шишлнг ке-сәәхн нәр-наад бүрдәв. Цаһан болн Ноһан Дәркин би цуг олн деедс бурхдт ик ханлтан өргжәх темдг болв. Энүнә хөөн кесг аһарин фонарь тенгрт тәвж йовулснь ицлин болн цаһан хаалһин темдг болв.
Кесг сарин эргцд мана орн-нутгин олн келн-улсин элчнр марһанд шунмһа кеәвр орлцад, дууһан өгв. Негдгч девснгд ут-т оодан арвн долан дундур сай күн нег обьектин төлә эврәннь дууһан өгв. Хальмгин цутхлнг Бурхн Багшин Алтн сүмин төлә ут-турштан һурвн зун далн дөрвн минһн күн дууһан өгч. Полуфиналд орх зөв авад, мана хурл Өмн үзгин федеральн округд түрүн ормд һарв. Эн күүкнә келсәр, оньдин дууһан өгнә. Цаарандан чигн дууһан өгх саната. Хурл мана танһчин бахмж болжана. Эн залу күүнә келсәр, күмн әмтнә тууж эн тосхлт хамгин сән тосхлт болжана. Энтн хамгин ик хурл. хамгин ке-сәәхн хурл болжана гиж эе келв. Эн күүнә тоолврар, хурл мана танһчин оюни темдг болжана. Эн баһ наста көвүнә темдглсәр, талдан регионмудын улс мана хурлын төлә дууһан өгтн гиж дуудвр кежәнә.
Июлин нег шинд марһана хойрдгч девснг эклв. Дөрлдәнә зокалар урдк цуг ашмуд уга кегдәд, шинәс дууһан өглһн болжана. Урдк аш тоод авгдшго. Ода Хальмгин хурл Әрәсән алдр темдг болхин төлә дәкнәс сайтд орад дууһан өгх кергтә. Энүнә төлә интернетын хәәврин системд “Россия 10” гидг үгмүд барлх кергтә. Обьектмудын спискд Бурхн Багшин Алтн сүм олж авад, бүртклһнә гүмүд болн то орулад, голосовать нертә кнопк дарх кергтә. Келхд, эндр өдрт Хальмгин хурл полуфиналд орсн найн обьектмуд дунд доладгч орм эзлжәнә. Нег өдртән һурв дәкж дууһан өгч болх. Хальмгин цутхлнг хурл Әрәсән шин темдг болхнь аль угай мана өгсн дууһас медгдх. Тегәд марһанд шунмһаһар орлцад, мана хурлыг дөннтн гиж дуудвр кежәнәвидн.
Арстана Светлана, Ирчин Алексей
