Июлин нег шинәс авн Әрәсән пенсионермуд хоршулһна әнгин мөнг авч чадхмн
Июлин нег шинәс авн Әрәсән пенсионермуд хоршулһна әнгин мөнг авч чадхмн. Эн туст федеральн закан үүлдврт оржана. Шин закан давсн жилин ноябрь сард батлж авгдсн билә. Иим мөнг өгхин төлә Әрәсән Пенсионн санг өрәл жилдән бүрдәмжин ик көдлмш кесмн. Зуг иим мөнг цуг пенсионермуд авч чадшго. Шин закаһар иим мөнг тавн сай күн авч чаджана.
Юрий Эрендженов болзгасн эрт пеньст һарв. Юнгад гихлә, энүнә көдлжәсн эрдмәр иим зөв бәәнә. Урднь электромонтер болж көдлжәсмн. Иим күнд көдлмшт дөчн жилдән көдлжәнә. Ода болхла сар болһн өгдг данцалһна мөнг авчана. Тер бийнь цаарандан көдләд, пенсин даатхлһна әнгинь икдүлжәнә. Иим әнгиг жил болһн көдлжәх пенсионермудт немнә. Хоршулһна әнгд бәәх мөнгиг хүвәрнь эс гиж бүклднь авх зәнг энүг невчк өврүлв. Пенсионер Юрий Эрендженовин келсәр, энүнә тускар газетд умшж, тегәд ирлцнһү эрлһ бичв. Ода цуг хоршулгдсн мөнгиг авх санатав гиж эн келнә.
Государственн софинансированя программд Юрий Эрендженов орлцсн уга. Эн программар күн болһн иргч пенсьтан сар болһн мөнг орулж өгнә. Ода болхла авх мөнгин кемжәнә тускар эрлһ бичснә хөөн һурвн сар болад медж авх. Пенсионер Юрий Эрендженовин келсәр, мана предприятин олн көдләч иим зөв олзлв.
Болв Пенсион сангд эн туст эрлһ орулж өгсн улсас цуһар мөнг авч чадшго. Юнгад гихлә, пенсин даатхлһан болн хоршулһна әнгс предприятин оурлж өгсн мөнгнәс тогтна. Даатхлһна әнгин мөнгнәс пенсионерин күч-көлснә сар болһн авдг пенсин кемжән тоолж һарһгдна. Пенсионн хоршулһна әнгин мөнгиг болхла пенсь авчах цуг улс авч чадшго. Иим зөв нурһлж тәвн һурвдгч жиләс авн жирн зурһадгч жилд төрсн залу улст болн тәвн тәвн доладгч жиләс авн жирн зурһадгч жилд һарсн күүкд улст хор минһн хойрдгч жиләс авн хойр минһн дөрвдгч жил күртл даатхлһна әнгд орулж өгсн мөнг авч чадх. Иим зөв күч-көлснә пенсьт һарсн болн болзгасн эрт һарсн улст бәәнә. Тер мет немр софинансированя программд орлцсн улс бас иим зөв авх.
Элст балһснд ода иим зун далн эрлһн орулж өггдв. Хотл балһсар Пенсион сангин заллтин то-дигәр, дөрвн дундур минһн күүнд пенсин хоршулһна әнгд мөнгн бәәнә. Элст балһсна пенсионн сангин заллтин ахлачин дарук Людмила Сариеван келсәр, даатхлһ кесн күүнә мөнгнә кемжәг бичж авсна хөөн. иим мөнг эдн авч чадх. Иим цаас авхин төлә Пенсионн сангд ирәд, эрлһ орулж өгх кергтә. Нег сарин эргцд иим эрлһ хәләх закан бәәнә. Эрлһ орулж өгсн күүнә счтед мөнгн бәәнү аль угай гисн шиидвр батлж авгдна. Хойр сар болад иим мөнгн пенсьла хамдан өггдхмн.
Пенсьт һарад уга баһ наста улст пенсин мөнг икдүлх арһ бәәнә гиж Пенсионн сангин көдләчнр иткүлв. Энүнә төлә иим әмтн эврәннь мөнгәр хаоршулһна әнгиг икдүлж чадх. Нег үлү эн мөнгиг государств хойр холванд икдүлнә. Иим программ зуг хйор минһн арвн һурвдгч жилин октябрин нег шин күртл үүлдхмн. Тегәд урдаснь пеньст һарх улс иим зөвиг олзлхд нег жил үлдв.
Хавтхна Элла, Хулхачин Николай
