Газ олзлсна өриг Хальмг танһчин предприятьмуд сентябрин нег шин күртл данцах зөвтә
Газ олзлсна өриг Хальмг танһчин предприятьмуд сентябрин нег шин күртл данцах зөвтә. Дәкәд нег тодлад келхлә, Элст балһсна энергетикүд ода дөрвн зун сай арслнг өрнд унв. Хотл балһсна бюджетд энергетическ компаня уставн капитал икдүлһнд хойр зун сай арслнг орулх шиидвр авгдв. Эн мөнгн эн жилин чилгч күртл өр данцалһнд йовулгдх.
Ик обьектмудт дула өгчәх котельна ик зунь ода хуучрад, элж одв. Троицкое селәнә цутхлнг больницин көдләчнр давсн үвлин киитиг кесгтән мартшго. Эн жил автономн котельн энд көдлх гиж эдн нәәлжәнә. Ах эмчин дарук Байрта Авшееван келсәр, иим оборудовань углж тәвхин төлә мөнгн муниципальн хазнас орж иржәнә. Больницин ах эмчин дарук Байрта Авшееван келсәр, эн мөнгәр дөрвн хәәсн хулдж авгдв. Дәкәд һурвн хәәс хулдж авх кергтә болжана.
Тер мет цутхлнг района больницин өөр бәәх “Золотой ключик” нертә бичкдүдин садын герт өдгә цагин некврлә ирлцәтә хәәс бас углж тәвх зура бәәнә. Ода районд нәәмн бичкдүдин учреждень бәәнә. Тенд автономн котель бәәнә. Иргч жилд Деед Яшкуль болн Ик Чонс селәдин школмудын гермүдт бас шин котельн көдлх зөвтә. Целинн РМО-н администрацин толһачин дарук Сергей Головковин келсәр, тиигхлә социальн халхин цуг обьектмудт автономн котельн көдлх зура күцц күцәгдхмн. Энүнә темдглсәр, иим төр хаһлсна йовудт мөнг болн материалмуд әрвлгдв. То-диг кеснә хөөн һурвн холванд мөнгн әрлвлгдв гиж медгдв. Тегәд чигн эдн ода газин өрн уга болв. Целинн района администрацин ахлач Виктор Джанджиевин келсәр, мана предприятьмуд болн учрежденьс газ олзлсна өрн уга. Иим мөнгиг эдн цаглань өгчәнә.
Тер бийнь Троицкое СМО-н медлд бәәх нег предприять ода күн бәәдлд тусв. Эннь "Коммунальник" нертә муниципальн предприять. Ода эдн Ставропольмежрегионгаз ниицәнд өртә бәәнә. Ут-тоодан зурһан зун тәвн минһн арслнг өрн цуглрв. Элст балһсна "Энергосервис" предприятьла дүнцүлхлә, иим өрн дегд ик биш болжана. Элстихн кесг сай арлснг өрнд унв. хальмг танһчин правительствин одахн болсн сүүрт иргч дула өглһнә кем эклтл газин компаньд цуг өринь өгх даалһвр Алексей Орлов райодын толһачнрт өгсмн. Тегәд чигн Коммунальник предприятин цуглрсн өрнә төриг Целинн РМО эврәннь чанһ бүртклһнд авла. Виктор Джанджиевин темдглсәр, ода эн предприятьд банкротствин төр хаһлгджана. Иргчдән залврин компань "Ставрополин межрегионгазд" өриг данцах зөвтә.
Ода болхла танһчин райодт Элтс балһснла әдл иим күнд бәәдл тогтсн уга. Өдгә цагт "Энергсервис" газ олзлсна дөрвн зун сай арслнг өр өгх зөвтә. Иим күнд бәәдләс хотл балһсн яһж һархнь медгджәхш. Өр эс данцахла дула өглһнә кем яһж эклмхб? Энүнә тускар министр Нелли Ткачева мана программд келж өгв. Нелли Ткачеван келсәр, Энергосервисин уставн капиталынь икдүлх шиидвр авгдв. Тиигхлә эдн өрин зәрм хүвинь данцаж чадх. Үлдсн мөнгиг предприять шишлнг графикар өгхмн.
Сентябрин нег шин күртл цуг райодын болн селәдын муниципалитетмуд газ олзлсна өриг данцах зөвтә. Эн төриг танһчин толһач эврәннь бүртклһнд авсмн.
Чучян Валентина, Хулхачин Николай
