Әрәсән шишлнг цергә әнгин цергчнрин сән өдрт нерәдгдсн марһан бачһуд дунд болв
Эндр Әрәсән цергә шишлнг әнгин цергчнр эврәннь эрдмин сән өдрән темдглжәнә. Иим церг Әрәсәд нег минһн йисн зун арвн нәәмдгч жилд тогтагдв. Өдгә цагт иим әнгүд ФСБ, МВД, МЧС, Минюстын болн государственн йосна талдан чигн федеральн органмудт бәәнә. Эндр Хальмг танһчин десантникүдин ниицән Әрәсән шишлнг әнгүдин нүүрлгч көдләчнрт болн ветеранмудт, дәәлдәнд әмнәсн хаһцсн салдснрин экнрт, спортын балһсна марһаст диилвр бәрсн улст байрин бәәдлд ачлврмуд бәрүлж өгх
Цергә сурһуль хойр минһн зурһан зун жирн зурһадгч тойгта цергә әнгин аһуд болв. Элст балһсна сурһульчнр яһж цогц-махмудан батрулсинь медж авхар болн ямаран төрскнч сурһмж авсинь медж авх күцл тәвж десантникүдин ниицән танһчин баһчудын цутхлнгла хамдан иим керг-үүлдвр бүрдәв. Хальмг танһчин десантникүдин ниицәнә ахлачин дарук Константин Кирпиевин келсәр, дорас өсж йовх баһчуд төрскнч сурһмж авх зөвтә. Эдн цергә байрин тускар медх зөвтә. Энүнә төлә иим керг бүрдәгднә. Эндр иим сурһульд орслцн көвүд өсхләрн төрскән харсж чадх гиж санжанав.
Сурһульчн зурһан командар хувагдад дөрлдв. Эдн дөрвн спортар дииләчән йилһв. Тер тоод автомат суһлж цуглулһна марһанд чадмган үзүлв. Энүнд эн даалһвриг хамгин шулуһар күцәснь диилвр бәрв. Бичкн көвүд иим даалһвриг дуран өгч күцәв. Йосн автомат һартан авад, йоста салдснрин эрдмтә болв.
Тер мет мини-футбольн марһан бас зүткәтә болв. Командсин ханьд сурһульчнрла хамдан эднә физкульурин багшнр наадв. Эдн чидлән негдүләд диилвр бәрхәр зүткв. Элстин техническ лицейин физкультурин багш Баснг Эльдеевин келсәр, иим марһан баһчудт кергтә. Негдвәр, иим керг-үүлдвр соньн һазрт цергә әнгд давулгджана. Көвүд төрскнч сурһжмж авхд туслна. Эндр дөрлдән сәәнәр бүрдәгдв. Элстин олн халхта гимназин арвдгч классин сурһульч Саша Болеевин келсәр, эн марһанд сән белдв кегдж. Иим дөрлдәнд түрүн болж орлцжана. Эндр зуг футольн марһанд наадв. Иим керг-үүлдвр дару-дарунь бүрдәхлә сән болх.
Десантн цергә ветеранмуд болхла марһан зарһчнр болв. Эднә келсәр, иим керг-үүлдвр баһчудт йир олз-туста болх. Иим кеәвр әәрмин чинр өөдүлгджәнә, дорас өсж йовх баһчуд эрүл-дорул кеәвр бәәхд сән нилчән күргх. ВДВ ветеран Баатр Сангаджиевин келсәр, шишлнг цергт церглх көвүд-чиирг болх зөвтә. Иим сурһуль баһчудт цергт церглхд сән белдвр болжана. Иргчдән иим медрл болн дамшлт эднд цергт мордхла тусан күргх. Цаарандан шишлнг цергә әнгд церглхд бас сән тусан хальдах.
Дөрлдәнә бүрдәһәчнрин келсәр, иим марһан жил болһн ьүрдәж давулгдх. Эндр асхлад Хальмгин десантникүдин ниицән Элст балһсна школмудын командс дунд болсн спортын марһасин аш дигллж, дииләчнрт болн призермудт байрин бәәдлд ачлрвмуд бәүрлж өгх. Тер мет Әрәсән шишлнг чинртә цергә әнгсин көдләчнриг, ветеранмудыг болн дәәлдәнд әмнәсн хаһцсн салдснрин экнриг мөрәлхмн.
Нәдвдә Тамара, Хулхачин Николай
