Элстин нәәмдгч микрорайона һучн негдгч герт ода күртл дулан өггджәхш
Элстин нәәмдгч микрорайона һучн негдгч герин патьрмудт ода күртл дулан өггдәд уга, халун усн чигн иржәхш, подьезмуд ахулгджахш, дула өгдг счетчик яслһна мөнгн икдв. Энүнә тускар герин бәәрн улс хургт келв. Талдан гермүдт хойр долан хонгт дулан өггджәсн кемд, эн герт ода күртл киитн. Арвн хонгтан халун усн уга. Герин ясвр мууһар кегджәнә гиж хургт орлцачнр келв.
Дула өглһнә кем эклснә хөөн хойр долан хонг давв. элст балһсна гермүдт дулан өөггджәнә, болв нәәмдгч микрорайона һучн негдгч герт ода күртл киитн. Раиса Насунован патьрт өдр-сө уга гилтә сплит-систем көдлжәнә. Тер бийнь гертнь аһарин кемжән арвн тавн градусас дуларжахш. Раиса Насунован келсәр, цугтан нег хора дулалад унтавидн. Оньдин сплит-систем көдлнә.
Тер мет эн гарин әмтн арвн хонгтан халун усн уга бәәнә. Герин эздүдин келсәр, иим йовдл дару-дарунь тогтна. Валентина Гайворонская келсәр, халун усн уга, киитн ус зәрмдән хаачкна. Иим бәәдл үвл зун уга тогтна. Горводканалд, залврин компаньд одлавидн. Тедн нег-негн талан заана.
Залврин компаня ах инженер дула болн халун ус өглһнә төрә иим цәәлһвр өгв. Восточный нертә ниицәнә ах инженер Юрий Дорджиевин келсәр, эн герин төрмүдин тускар меднәвидн. Эннь зуг мана гем биш. Энүг Энергосервисла талдан чигн организацла хамдан хаһлх кергтә.
Хургт орлцачнр залврин компаня көдлмшиг таасжахш. Герин эргнд хог-бог дала, подьездмуд киртә болн терз-үүдн хамхра. Тамара Лиджиеван келсәр, герин ораһар оньдин дусал дусна. балконд, кухньд, лифтерн усн орна. Нина Коноплянникован келсәр, лифтмуд зәрмдән көдлхш. Лидия Мучкаеван келсәр, мана герт киитн болсн деер, хог-бог зөөж һарһгдажхш, терз-үүд күн ясжахш.
Герин эздүдин келсәр, эврәннь зөвлнгин тускар кесг дәкж Элстин һардачнрт, залврин компаня элчнрт келсн билә. Болв эднә төр хаһлгджахш. Тегәд эврәннь хургтан ЖКХ-н региональн министерствин специалистнриг дуудв. ЖКХ-н министертсвтин әнгин ахлач Владимир Налгировин келсәр, удл уга шишлнг комиссь тогтаһад, гериг бүклднь шинжлж хәләхвидн. гемтә һардачнриг засгла харһулад, цуг төрмүдиг хаһлх санатавидн.
Келхд, иим бәәдл Элст балһсна талдан чигн гермүдт тогтв. Жилишн-коммунальн церглтин көдлмшиг элстихн таасжахш. президент Медведевин келсәр, ЖКХ-н халх шинрүлһнә программ күцәгдсн уга. Залврин компаньс нерән сольсн бийнь, урдк кевәр мууһар көдлжәнә.
Пихона Нина, Хулхачин Николай
