Үвлин кемд жолачнр машинд талдан рези тәвх зөвтә

Түрүн цасн орад киитн өдрмүд тогтад Хальмгт йоста үвл ирв. Эн кемд маши залачнрт зунын резиг үвлин резинд сольх кергтә болна. Эн халхар мана танһчд ямаран бәәдл тогтв?

Өдгә цагт Элст балһснд шиномонтажн мастерской дала болв чигн, эн өдрмүдт энүнд ик чеерүд цуглржана. Эврәннь чеерүдән кесг машин күләжәнә. Үлгүрнь, хөрн нәәмн жилдән маши залжах Олег Савченко эндр эврәннь машина төгәһинь сольж чадшго гиж алмацжана.

Жолач Олег Савченко келсәр, цуг һазрт ик чеерүд бәәнә. Тавн станц эргәд ирж. Тегәд эндр рези сольж болшго бәәдлтә.

Ода зунын резиг үвлин резинд сольхд жанһар болж одв гиж жолачнр келнә. Иим көдлмшиг ик урдаснь кесн әмтн ода санамр йовж чаджана.

Жолач Евгений Овшиновин келсәр, цуг станцд чеерүд дегд ик. Алтан Очировин келсәр, киитн өдрмүд тогтхла жолачнр резиһан сольхар һарч йовна. Эртәснь кех кергтә.

Хөрн тавн жилдән жолач болж көдлжәх Сергей Фоменко болхла эврәннь машинд талдан эв-арһ олзлх саната. Сергей Фоменко келсәр, мана танһчд болджг үвлин кемд липучк сән болна.

Үвлин кемд ямаран рези машиндан тәвхин тускар жолач болһн эврән шиидх зөвтә. Эннь машина эздүд эврәннь мөнгән хәләһәд авх зөвтә. Болв иим шүүвр эрк биш ахр болзгт кех кергтә. Иим сольвр эс кесн жолачнр хаалһд зеткртә йовдлмуд учражана.

ГИБДД-н инспектор Василий Кекеевин келсәр, декабрин һурвнд гиигн “ВАЗ” маши залж йовсн күн федеарльн хаалһин һурвн зун арвн нәәмдгч дуунад машиһан көмрүлв. Энүнә ашт жолач танһчин больницд орулгдв. Тер өдрин бийднь “ВАЗ” маши залж йовсн күн йоһвн кү дәврж. Энүнә ашт шав авсн күн больницд орулгдв.

Элст балһсна эдл-ахун церглт болхла үвлин кемд көдлхдән белн бәәнә. Энүнә тускар муниципальн ведомствин һардач келнә.

Хотл балһсна эдл-ахун директор Валерий Будаевин келсәр, үвлин кемд тавн тонн элс болн давс белдж авч. Арвн шишлнг техник көдлхдә белн. иим техник үвлин кемд көдлнә.

Онц темдглхд, Элст балһсна эдл-ахун көдләчнр үвлин кем эклхлә, өдр-сө уга көдлдг болв. Тенгрин бәәдл генткн сольгдхла эдн хаалһст һарад көдлх.

Хавтхна Элла, Котина Валерий