Кабардино-Балкарин журналистын санл тодлгдв
Дигтә нег жил хооран "Вести-Кабардино-Балкарь" программин һардач журналист Казбек Геккиев әмнәсн хаһцв. Асхна эфир төгсснә хөөн гер талан хәрж йовхлань боевикүд энүг хаһад алж. Эн зәнг Әрәсән цуг улсиг үүмүлв. ВГТРК медиахолдингин көдләчнр мана орн-нутгт учрсн йовдлмудын тускар келж өгәд, нег хамцу команд болж көдлжәнә. Хөрн нәәмн наста Казбекиг мана телекомпаня журналистнр таньдг билә.
Нег жил хооран мана телекомпань дөчн тавн жилин өөнән темдглсн билә. Тиигхд эврәннь йөрәлән “Кабардино-Балкарь” ГТРК көдләчнр маднд илгәсн билә. Харм төрхд, эн йөрәл Казбек Геккиевд сүл йөрәл болв. Декабрин тавнд бәәрн шин зәнгсин һарц энүнд сүл һарц болж. Энүнлә хамдан көдлжәсн улсин келсәр, шин зәнгсин һарцин хөөн Казбек байртаһар инәһәд, дурта күүкн талан адһдг бәәсмн.
“Кабардино-Балкарь” ГТРК — көдләч Людмила Сурженко келсәр, Казбек Геккиевиг талдан көдлхәчнрәс баһар меддг бәәж. Зуг нег өдр энүнә сән занг болн һольшг зангинь медж авч. Компаня цуг журналистнриг зургт цокж авх кергтә билә. Казбек шоглад, инәһәд, олн-зүсн кевәр зурган цокулв. Харм төрхд, эн баннериг өлгж чадсн уга.
Телевиденьд Казбек хойр минһн арвдгч жилд ирж көдлв. Шин зәнгсин һарц һарддг билә, зокьялын программд бас көдлж үзв. Ахр цагин эргцд сән дамшлт хоршаһад, кергән сәәнәр меддг көдләч болв. Һольшг зангта болн гүн медрлтә күн билә гиж энүнлә хамдан көдлжәсн улс келнә.
Жанна Гуляеван келсәр, эврәннь сюжетин төлә кергтә улсиг кесгтән хәәдг билә. Иим улсиг олж авда маднла тоолврарн хувалцдг билә. Мартин Чеченовин келсәр, эврәннь кергән сәәнәр меддг көдләч билә. Цевр, цаһан саната күн билә. Эн көдләчин келсәр, оньдин орж ирхләрн инәмсклдг бәәсмн. Иим кү үзхлә седкл байрлна. Хәрү инәмсклх дурн күрнә. Осман Казаковин келсәр, энүнә дү гиж бийән тоолдг бәәж. Ах болад оньдин селвг өгдг бәәж.
Зөв-йосна органмудын көдләчнр хойр сарин эргцд энүг алсн кү илткж авв. Бандитнр талдан чигн күнд кеәвр зака эвдсн бәәж. Тер тоод Кабардино-Балкарин аграрн университетин ректориг алсн билә. Казбек Геккиевин санл тодлад, “Кабардино-Балкарь” ГТРК “Облаченный в лучи солнца” нертә фильм цокж авв. Энүнд хамдан көдлжәсн улс көдлмшиннь туск тодлврмударн хувалцв, баһ наста журналистын үүдәгч зуран тускар келж өгв.
Дмитрий Ивахненко, Ирина Гольдинова
