Үстин района Эрдниевский поселкин улс усн ирхинь күләжәнә

Үстин района Эрдниевский поселкин әмтн уудг усн ирхинь тенкән уга гидгәр күләжәнә. Селәнд кесг жилдән усна сурвлжн көдлжәхш. Эндр өдрт хурц төр экләд хаһлгджана. Ода нег минһн кубическ метр усн ордг ик сав тосхгдв. Ижлин усн кезә селәнә улсин гермүдт ирхин тускар мана үүдәчг баг соньмсад Үстин районд одад ирв.

Хөрн жилдән Үстин района Эрдниевский селәнә улс уудг усн уга бәәнә. Ода селәнә бәәрн хойр зун өрк-бүл зөөврин усар бәәнә. Нег цистерн усн эс гиж дөрвн кубическ метр уудг усн һурвн зун арслнг күрчәнә. Энүг зурһан шахтн худгас авч ирнә. СМО-н толһач Никоалй Кашаевин келсәр, ода Ижлин ус нааран татхин төлә сурвлжна турва углж тәвх кергтә. Эннь хамгин ик боомтг болжана. Специалистнр шинжлсн зун долан өрк-бүлин гермүдәс зуг һучн негн герт усна колонк олзлж болх.

Эрдниевский поселкин бәәрн әмтн ода эн хурц төр удл уга хаһлдгдх гиж нәәлжәнә. Ода селәнд газ ирв, уудг усн ирхлә, селәнә улсин бәәдл-жирһл ясрх. Нег үлү дөнцл эдл-аух бәржәх улс техническ ус олзлж чадх.

Эрдниевский послекин бәәрн күн Валерий Хечиевин келсәр, селәнә гермүдт уудг усн ирхлә, сән болх. Энүг бәәрн әмтн тенкән уга гидгәр күләжәнә.

Өдгә цагт Эрдниевский селәнә улсиг уудг усар тетклһнә көдлмшин түрүн девснгнь төгсв. Селәнә социальн делрглтин федеральн шишлнг программар хойр минһн арвн негдгч жилд энд церв усна нег минһн кубическ метр ордг ик сав тосхгдв. Энүнә тосхлтд цуг бюджетмудас арвн негн сай арслнг олзлгдв.

Үстин района Эрдниевский СМО-н администрацин толһач Николай Кашаевин келсәр, хойр долан хонг хооран Ижлин усиг Цаһан Амн селәнд өгдг болв. Эндәс района цутхлнг күртл зун дууна. Тегәд турва татхд жанһрта болх. Тегәд чигн Юста селәнд насос углж тәвгдв. Энүнә дөнгәр Эрдниевский селнә усн ирх.

Үстин района дәкәд хойр селәнд Юста болн Таталд хуучрад эвдрсн усна сурвлж шинрүлж ясх төр тәвгджәнә. Николай Кашаевин келсәр, эндр өдрт СМО-н толһачнр болн района һардачнр поселкс дунд усна сурвлж татлһна проектн-сметн документац экләд белджәнә.

Бевина Мергн, Бадмаран Владислав