Зурһан селәнә улс зөөврин ус хулдж авчана
Ода Баһ Дөрвдә района Зурһан селәнә улс зөөврин ус хулдж авчана. Иим күнд бәәдл яһад энд тогтсмн. Энүнә тускар мана сюжетас медж болх.
Сүл сармудт Баһ Дөрвдә района Зурһан селәнә бәәрн әмтн зөөврин уудг ус уужана. Ода энд хойр зун күн бәәршлжәнә. Усна булгин уста худг послекин захд бәәнә. Эндәс ус авхин төлә хам-хоша бәәх Ханата селәнәс ус ззздг маши дуудж авад, мзнг өгх кергтә болна.
Жилд хойр дәкж бәәрн боодгур Ижлын цувгас техническ усн ирнә. Энүнә нег кубическ лиитрнь оад һурвн деншг күрчәнә. Бәәрн бюджетд энүнә төлә далн минһн арслнг йилһж өггдв. Ханатинск селәнә муниципальн бүрдәцин ахалч Санһж Кононовин келсәр, эн цувгар зуг техническ усн гүүжәнә. Энүнә зәрмнь һазрт ивтрәд, уга болж одна. Хагсу һазрт усн агчмин зуурт ивтрнә. Эн жил догшн халун болад усн ирсн уга гиж Кононов келнә.
Баһ Дөрвдә района муниципальн бүрдәцин һурвн поселкин төлә ирх хөрн дөрвн сай кубическ метр уснас зуг йисн сай кубическ метр усн ирв. Халун һан болад, эн усна ик зунь һазрт ивтрәд, әмтнд күртсн уга. Зәрм усиг царнгудт орулв. Үлдсн усн ханата поселкд күртв. Зурһан селәнә улст усн эн жил күртжәхш. Онц келхд, бәәрн коммунальн церглтин предприятьмуд энергетическ компаньд зурһан сай арслнг өртә. Тегәд чигн энергетикүд Ижлын цувгд ус сөрдг сооруженьд электрокүч баһар өгв.
Калммелиоводхозин Сарпинск филиалын ах энергетик Владимир Каруевин келсәр, иим өрн давн жиләс авн хурв. Танһчин бюджетас мөнгн ирхш. Федеральн хазнас невчкн мөнгн ирв. Ода электрокүч өдгд арһ уга болжана. Мөнгн уга болад иим күнд бәәдл тогтв.
Иргч намра бәәрн усн боодг дәкәд усра дүүрх гид йос бәржәх улс келнә. Болв зун төгстл ода чигн хойр сар бәәнә. тегәд Зурһан селәнә улст уудг ус хулдж авх мөнгн уга болжана. Зәрм өрк-бүлмүд уудг ус хулдж авхин төлә хойр минһн арслнг сардан һарһна. Тер бийнь эн хурц төриг хаһлж болх. Энүнә тускар района һардачнр селәнә улсин хургт зәнглв.
Хамгин түрүнд сән уста худуг турва татад, насосн оборудовань хулдж авх кергтә. Энүг углж тәхд бас мөнгн кергтә болжана. Тиигхлә селәнә улс зөөврин ус хулдж авшгоә Ут-турштан энүнә төлә хойр зун тәвн минһн арслнг кергтә. Техническ усар теклһнә төриг района ахлачнр хаһлшгоә Тегәд бәәрн әмтн әврән мөнг цуглулж авх зөвтә. Болв уудг усна булгд усн күрхий аль угай? Эннь медгджәхш. Дәкәд болхла Октябрьск районас тутрһин чекмудас ирсн ус цувгас сөрж авх кергтә болх. Эн цувг поселкас арвн дуунад бәәнә. Тенд “Ханата” нертә СПК шин насосн сооружень углж тәвв. Энүнә төлә Зурһан поселкин әмтн дөрвн тонн солярк хулдж авхин төлә зун тәвн минһн арслнг хураж авх зөвтә. Эннь селәнә улст ик мөнгн. Ода эдн цөн өдр болад эн туст шиидвр батлж авхмн. Тер бийнь һаур ик болх. Зурһан селән улс энүг дааж чадхий аль агай. Ода деерән меддг арһ уга.
Санкун Кермн, Колдан Церн
