Лаганск районд заһсчнрин байр болв
Лаганск районд заһсчнрин сән өдр темдглв. Эн эрдмәр бәәрн әмтн олн жилмүдин эргцд көдлж йовна. Байрин керг-үүлдврмүд өрүн эрт эклсн билә.
Сүл жилмүдт тогстн сән авьясар Лагань балһснд заһсчин ик байр болна. Заһсчд нерәдгдсн бумбд бәәрн улс болн гиичнр әмд цецгүд тәвв. Келхд, ик кезәнәс авн заһсчнр хоорндан ни-негн коллектив болж көдлнә. Тедн дунд олн-зүсн эрдмтә әмтн бәәнә. Тегәд иим байрин өдр эдн хамдан цуглрад, урдк цаган тодлад, шог-инәдтә тууж нег негндән келж өгнә. Тер мет байрин йовудт хаврин кемд заһс бәрлһн көдлмшин аш диглгдв. Энд көдлсн яармд болхла олн улс тенгсин заһсна зүүтә хот-хол хулдж авч чадв. Заһсчнриг тенгсәс тосж авлһн нертә театрализованн нәр-наадыг Лаганя района өрк-бүл болһн йир сәәнәр меднә. Тенгсәс заһсчнр дала заһ Бәрж авад, эврәннь селәнә улсан тоохла сән болна. Наадн керм деер болв гиж медгдв.
Лаганск района бәәрн әмтнд заһсчин байр хамгин дурта байрин негнь болжана. Юнгад гихлә эн районд заһс бәрлһн хамгин һол керг болна. Лагань балһснд күн болһн эн көдлмшлә өөрхн залһлдата болжана. Байрин өдр Хальмг танһчин нүүрлгч заһсчнр күндлһнә һашгудар болн үнтә белгүдәр ачлгдв. Эврә дурар үүлдг бәәрн художественн коллективмуд байрт ирсн улсин төлх соньн нәр-наад үзүлв.
Хальмгин толһач Алексей Орлов заһсчнрла күүндсн хөөн заһ эд-бод кедг цехд одв. Эн предприять жилдән долан зун тонн заһс эд-бод кенә. Эднә кесн заһсна зүүтә хот-хол Москва, Санкт-Петербург балһсдт йовулгдна, тендсә цуг Әрәсәд хулдгдна. Танһчин толһач Алексей Орловин келсәр, иим цех соньн болжана. Сән предприятьмуд олн болхла, Хальмг танһч сән чинртх продукц олар кеж чадх. Заһсчнрт дөн болх кергтә. Эннь Хальмг танһчин правительствин төр болжана.
Йириндән хзаһсчин байрин өдр зунын дундурар болна. Иим кемд эн эрдмин әмтн заһс олар бәрнә, тер мет заһс бәрдг талдан чигн улс бас сул цагтан иим кергт дуран өгнә. Келхд, Алексей Орлов бас заһс бәрхдән дурта күн. Алексей Орловин темдглсәр, эн спорт йир сән, күн амрхд тааста. Иим кемд кеер һарад, цевр аһар кииләд, чееж сергнә.
Келхд, зәрм лаганцнр байрин өдр тенгст тосв. Иим сән өдрлә района цуг өрк-бүлмүдт заһсна зүүтә хот-хол эрк биг бәәнә.
Ээнән Делгр, Бадмаран Владислав
