Яшкульск района эдл-ахус үвлд белн
Үвлд тохнята белдвр кегдв. Яшкульск района малчнр иргч үвлд күрх малын хотын йирн нәәмн процентинь белдж авч. Ода хөөчнрин дәкәд нег дааврта көдлмш — хөөдт көг тәвлһн күцәгджәнә.
Рамиз Тагиев крестьянск эдл-аху һурвн жил хооран секв. Ода эврәннь аваль Жанна болн хойр нөкдләһән хамдан мал өскжәнә. Энүнә хош у-өргн хальмгин теегин тал дунд зогсжана. Тер бийнь Тагиевихна һурвн бичкдүд керг уга бәәхш. Өдртнь экцнь көвүдән школд күргнә, асхлад өрк-бүләрн ширә эргәд сууна. Эдн өдгәц агин некврлә ирлцәтә герт бәәршлжәнә, энүнд газ, халун усн, интернет, телевизор болн талдан чигн бәәцин сән таал бүрдәгдв. Малчнр өрүн эртәс авн асхн ора күртл кеер малын ард йовна. Эдн долан зун хө өскж хәләжәнә. Иргчдә бод мал өскх санан бәәнә. Рамиз бичкнәс авн малчин эрдмлә таньлдв. Үвлин кемд белдвр кев, хаша-хаацс дулалв, малдан үвлд күрх хот белдж авв.
“Эдгар” нертә крестьянск эдл-ахун толһач Рамиз Тагиевин келсәр, эврәннь малын төлә зун рулон өвсн хулдж авч. Деернь арвн тонн буудян зүүтә хот бәәнә. Эннь долан зун хөөнд үвлд күртх зөвтә.
Ода фермер болһн зуг биүдән нәәлж көдлжәнә. Эднд государств цуг халхаснь нөкд болжана. Тегәд чигн бәәрн фермермүд көдлмштән сән үзмж бәрж көдлжәнә.
“Харахусовский” СПК-н ахлач Владимир Савченко келсәр, эн жил селәнә эдл-ахун халәар күнд бәәдл тогтв. Ода нег рулон өвсн зурһан минһн арслнг күрчәнә.
Тер мет иргч үвлд малч Василий Манджиев бас белн бәәнә. Эн халхар малч һучн жилдән көдлжәнә. Хөөч эдельбайск тохма хөд өскжәнә. Тер мет Манджиев тохма мөр бас өскжәнә. Үвлин кемд буудян зүүтә хот белдж авв, малдан гемәс саглулһна тәрлһ кев, хаша-хаацс ясж белдв. Иим хаша-хаацста малчнрт киитн үвл әәмшг уга болх. Ода малчнриг зуг нег төр үүмүлжәнә. Һазр нәәмәдлһнә үн дегд ик болжана.
“Жанһр” нертә крестьянск эдл-ахун толһач Василий Манджиевин келсәр, Яшкульск районд һазр нәәмәдлһнә үн хамгин ик бәәдлтә. нег гектарнь һучн негн арлснг күрнә. Ода хөөнә, үкрә болн мөрнә махн зөвәр кимдрв. ВТО-д орснас авн иим бәәдл тогтж. Тәвн процентд махн кимдрж.
Яшкульск района арвн һурвн селәнә эдл-аху, һурвн зун жирн крестьянск-фермерск эдл-аху болн күсдундур минһн онц эздүдин эдл-аху үвлд сән белдвр кев. Энүнә тускар агропромышленн делгрлтин района әнг зәнглв.
Яшкульск РМО-н администрацин АПК-н делрглтин әнгин ах специалист Максим Кануковин келсәр, үвлзлһнд ут-тоодан арвн минһн һар бод мал болн хойр зун арвн негн минһн хөн оржана. Үвлд күрх малын хотын кемжән йирн нәәмн процентд белдж авгдв. Ода хөөдт көг тәвлһнә көдлмш кегджәнә. Эн көдлмш тәвн негн процентд күцәгдв.
Района хөөчнр жил болһн хәләжәсн ххөдәсн сән төль авна. Ирчг хаврар эдн зун хөөнәс зун һурвн хурһ авх даалһврта. Эн күцлиг эрк биш күцәхәр района малчнр шунж көдлжәнә.
Хавтхна Элла, Котина Валерий
