Волейбол шинәс сергәж босхгдх
Волейбол наадн сергәгдж босхгдх. Танһчин спортын, туризмин болн баһчудын политикин министерств мана танһчд эн спортыг сергәж босхлһна төр халһх саната. Элст балһснд болсн секәтә марһанд нәәмн команд орлцв. Эннь дегд баһ. Юнгад гихлә ода Элст балһснд олн школ, сурһулин заведень, кесмг учрежденьс болн организацс бәәнә. Эннь бас учрта. Яһад гихлә, йирдгч жилмүдт болсн хүврлт мана бәәдл-жирһлд бас му нилчән күргв. Тиигхд шишлнг спортивн школмуд хаагдв. Тер цагас авн волейбольн марһас бүрдәж давулгджахш. Мана танһчин нер холд туурлуж йовсн командс уга болж одв. Билгтә спортсменмүд болн тренермуд мана танһчас нүүж одв. Тедн дунд срортын йоста оддуд бәәсмн.
Хальмгин волейбольн хамцу командын капитан Баатр Васькин кесг жилдән тренер болж Москва балһснд көдлв. Энүнә нилчәр Москван педагогическ институтын команд нүүрлгч ормд һарсмн. Ода Әрәсән деед сурһулин команд дунд энүнә команд хамгин сән тоод йовна. Одахн Баатр Васькин Элст балһснд хәрж ирв. Энүнә хамгин дурта волейбол наадн Хальмгт дәкнәс делгрлт авад, урдк жилмүдлә әдл сән күцәмж бәрхинь нәәлжәнә.
