Университетд шин һәәхүл секгдв
Хальмгин университетд хальмг улсиг цаажла харһулсна далн жилин һашута өөнд нерәдгдсн һәәхүл секгдв. Энүг деед сурһулин көдләчнр эврән белдв. Эдн гертәсн өрк-бүлин альбомас зургуд авч ирв. Зәрм зургуд өвәрц болн соньн.
Шин һәәхүл хәләхәр ирсн әмтнә келсәр, жирн жил болсн зургуд энүнд үзх гиж санжасн уга бәәж. Энүнә тәвгдсн олн-зүсн материалмуд тер һашута цагин герчлһн болжана. Университетин ректор Бадм Салаевин келсәр, хальмг улсин һашута туужин тускар баһчуд медж авхд һәәхүл сән арһ өгчәнә.
Университетин номин әнгд көдлжәх Кермн Бадмаеван келсәр, һәәхүл белдсн цагт КПСС-ин хөрдгч сьездин көдлмшт нерәдгдсн өрк-бүлин архивас авсн салу халх белдхәр седж. Эн сьездин шиивдрәр хальмг улсин нерн цеврдүләд, хальмгуд төрскн һазртан хәрж ирсмн. Эн зургт Никита Хрушевин төрл эгч экин халхар энүнә һарлдсн ээж цокж авгдсн бәәж. Эн зургуд кезә цокж авгдсн тускар Кермн Бадмаева медхш. Зуг энүнд Хрушевин хол элгн цокж авгдснь ил герч болжана. Энүнә тускар олн әмтн медхш. Зуг хамгин өөрхн улс меднә гиж Кермн келнә.
Кермн Бадмаеван келсәр, эн зургт Никита Сергеевич Хрушевин элгн-саднь Петр Ильич Хрушев бәәнә. Эн күн Санкт-Петербургд бәәж. Сәәһән хәәтл энүнә ээжд бичг бичд билә. Сүл бичг найн зурһадгч жилд ирв. Цаажла харһсн улсин нер хөрдгч сьездин шиидвр авснд хальмгуд Хрушевиг дурлдг билә.
Хальмгин университетин доцент Вера Паляева эврәннь өрк-бүлин туужин тускар келж өгв. Энүнә экнь дәәнә цагт Каспийск флотильд церглж, Сталинград балһс харслһна догшн дәәлдәнд орлцв. Дөчн дөрвдгч жилд энүг хальмг күн гиһәд, талдан хальмгудла әдл фронтас буулһв. Эдниг цугтаһин Ярославль балһснд бәәршлжәсн цергә әнгд йовулв. Тенд хамдан йовсн улсин список кеж. Эднә нер-уснь һәәхүлд олж болх.
Вера Паляеван келсәр, эдниг фронтас буулһад, цергә-тенгсин тосхлтд йовулж. Эннь мөрякудын Широклаг болж һарв. Эдн талдан келн-улс гиж бийән бичсг уга. Спискд хөрн зурһан күн бәәнә. Экнь өнгрхлә документ заагт олж авч. Энүг экнь дәәнәс авч ирж. Дәкәд болхла дәәнә цагин дуудын дегтр бәәнә. Энүнд дун болһна дора цаг болн час күртл тәвгдж.
Һәәхүлд соньн кесг материалмуд тәвгдв. Энүгәр университетин оютнр дипломн болн номин көдлмш бичхәр соньмсжана. Санлын нег сара хонгин керг-үүлдврмүдин йовудт шин дегтрин түрүн үзүлвр болх, үүдәгч марһас бүрдәгдх, оютнрин керг-үүлдвр бүрләж давулгдх. Цуг эн керг-үүлдврмүд баһчудт төрскнч сурһмж өглһнд туслх, цаажла харһад әмнәсн хаһцсн улсин санл мөнкрүлх.
Ээнән Ольга, Очра Сергей
