Школд сурһулин кемжәнд сольвр орулгдх
Школан төгсжәх көвүд-күүкд орс келнә болн литературин негдсн ЕГЭ-н шүүвр эс гиж нәәрүлж бичлһнә шүүвр өгх зөвтә. Энүнә тускар күүндвр кесг жилдән болжана. Иргч жиләс авн нәәрүлж бичлһнә шүүвр дәкнәс школмуд орулх зура бәәнә. Школмудын төлә эрдм-сурһулин кемжә сольх даалһвр Әрәсән президент эрдм-сурһулин болн номин министерствд өгв. Иим шүүвр орулхла орс келнә болн литературин сурһулин медрл сән болх зөвтә. Иим шиидврлә сурһульчнр болн эк-эцкнр зөвшәржәну аль угай?
Карина Васильченко Элстин техническ лицейин арвн негдгч зәнглһнә-технологическ класст сурчана. Тер бийнь күүкн орс келнә олимпиадт кесг дәкж орлцад, призермудын тоод орла. Иргчдән компьютерн техологин эрдм шүүж авх саната. Тегәд нәәрүлж бичлһнә көдлмш бичдг дасх керг уга гиж тоолжана.
Элтсин техлицейин арвн негдгч классин сурһульч Карина Васильченкон келсәр, нәәрүлж бичлһнә шүүвр керг уга. Зәнглһнә технологическ класст сурчана. Иим эрдмд һол оньг өгчәнә. Гуманитарн эрдм шүүж авсн баһчуд иим шүүвр өгх зөвтә.
Социальн-гуманитран класст сурчасн Артем Тимофеевин тоолврар, нәәрүлж бичлһн эврәннь ухан-санаһан медүлхд туслна, гүн уха тунһахд сән нилчән күргнә, олн үгмүд хәәж олзлхд сән болна.
Элстин техлицейин арвн негдгч классин сурһульч Артем Тимофеевин келсәр, нәәрүлж бичлһн таасгдна. Эврәннь ухан-санаһан бичж медүлж чадх. Күн болһн белдвр кехлә, иим шүүвр өгч чадх.
Әрәсән школмудт нәәрүлж бичлһнә шүүвр тавн жилин хооран өгдгән уурв. Школмудын төлә кемжә сольх Әрәсән эрдм-сурһулин министерствин седвәрәр, орс келнә болн литературин сурһульчнрин медрл нүг болхин төлә школан төгсжәх баһчуд нәәрүлж бичлһнә шүүвр өгх зөвтә. Энүнә тускар эк-эцкнр нег мөслгч шиидвр уга.
Энүнә келсәр, иим шүүвр кергтә, баһ настадан нәәрүлж бичлһнә шүүвр өгдг билә. Ода баһчуд орс кел мууһар меднә. Ода баһчуд нег халхар сурһуль дасжана гиж эн тоолжана.
Дорас өсж йовх баһчуд ода компьютерар дурлж көдлнә. Ода сурһульчнр дегтрмүд умшдган уурв. Харм төрхд, сүл цагт орс келнә зокалыг көвүд-күүкд мууһар меднә. Интернетд дегд олн зәнг бәәнә. Бичкдүд энүг сәәнәр йилһж шүүж авч чаджахш. Тегәд дорас өсж йовх баһчуд дегтрмүд умшад, гүн уха тунһаж чадхий аль угай гисн сурвр босжана.
Элстин техлицейин орс келнә болн литературин багш Наталья Сокольцован келсәр, гуманитарн класст иим шүүвр орулж болх. Ода деерән цуг сурһульчнр иим шүүвр өгхдән белн биш.
Суврһульчнрин медрл бүрткж үнлжәх ЕГЭ-н государственн шүүвр олн улсиг алмацулжана. Шүүврин бланкд кергтә һазрт темдг чикәр тәвхинь багшнр дасжана. Зәрмдән ЕГЭ-н шүүврин даалһвр шүүвр экләд уга бәәтл интернетд һарч ирнә. Сурһульчнр хоорндан орс келәр чикәр күүндж чадхш, бичәчнрин үүдәврмүд умшжахш.
Эн сурһульчин келсәр, орсин бичәчнрин үүдәврмүд хач-хач умшна. Энүнә келсәр, классическ үүдәврмүд умшхадн дурта.
Нәәрүлж бичлһнә шүүвриг дәкнәс школмудт орлухин тускар күүндвр ик кезәнәс авн эклв. Ода Әрәсән Президентин даалһврар, эрдм-сурһулин министерств иргч жилин мартын нег шин күртл энүнә тускар эврәннь селвгүдән орулж өгх зөвтә. Иим сольвр орулгдхла, сурһулин шин жиләс авн нәәрүлж бичлһнә шүүвр дәкнәс школмудт орулгдх. Тиигхлә көвүд-күүкд бичәчнрин үүдәврмүд умшад, энүнә тускар эврәннь ухан-санаһан бичж медүлж чадх.
Елена Алексенко, Эрнжәнә Эрднь
