Удл уга мана танһчин әмтн цифрин телевидень хәләж чадх
Эн жилин октябрин дундурар Хальмг танһчд цифрин телевидень экләд көдлх. Энүнә тусчкар эндр РТПЦ-н директор Ишля Манджиев журналистрла болсн пресс-конференцд зәнглв. Ода нег сарин эргцд иим эв-арһ дамшлтын чинрт танһчин зун йисн селәд-поселкст көдлжәнә. Тер тоод иим эв-арһар хол селәдт Зунда Толһан, Артезианабәәрн әмтн теелүзүлвр хәләжәнә. Эн цагин туршарт цифрин телевидень эвдрлт угаһар көдлв. Энүнә төлә Элст балһснд, Улан-Хоолд болн Утта селәнд оборудовань углж тәвгдв. Ода иим эв-арһар танһчин цуг улсин жирн долан процентнь телевизор хәләжәнә. Цифрин эв-арһар арвн федеральн канал хәләж болх, тер тоод Вести-Калмыкия программ, һурвн радиостанц сонсж болжана, тер мет бачм чинртә йовдлмудын тускар шишлнг докья сонсж болх. Хальмгин региональн телеканалыг лицензь өгснә хөөн шин жиләс авн танһчин цуг әмтн хәләж чадхмн.
