Удл уга Көтчнр селәнә бичкн сурһульчнр шинрүлгдсн у-сарул классмудт сурһулян дасхмн
Әрәсән хуучн школмудыг ясхин төлә федеральн бюджетас мөнгн йилһж өггдв. Эн мөнгәр кергтә ясврин көдлмш кегдв, тер тоод спортын залмуд, дөнцл хорас бас шинрүлгдх. Онц келхд, мана танһчин зәрм школмудь бас иим мөнгн ирв. Көтчнр селәнә эклц школд удл уга иим ясвр кегдәд төгсх. Удл уга бичкн сурһульчнр шинрүлгдсн у-сарул классмудт сурһулян дасхмн.
Давсн зун жилин йирдгч жилмүдт энд района цутхлнгин нег школ бәәсмн. Гимназин директор Замба Кушовин келсәр, Әрәсән экономикин күнд цагт сурһульчнрин то зөвәр баһрв. Тегәд чигн школмудыг болн садмудыг мөнгәр теткх арһ уга болв. Энүнәс көлтә цуг сурһульчнриг нег гимназьд сурһдг болв. Ода болхла цаг соляд, бичкдүд олар төрдг болв. Эн жил негдгч һуврн класс секгдв. Тегәд чигн эклц классмудын сурһульчнр ах классин сурһульчнрас салу сурх зөвтә гиж шиидгдв. Хамгин бичкн сурһульчнриг хуучн школын герт орулхар зуралгдв. Эн гер өндр, классмуд у-өргн, ик актов зал бәәнә. Көтчнрә олн халхта гимназин директор Замба Кушовин келсәр, района һардачнр актов зал шинрүлж ясв, шин үүд тәвж өгв. Школын һазадкиг ясх мөнгн күртсн уга. Болв танһчин толһач эн жилин хаврар энүнә төлә мөнг йилһж өгхән медүлв.
Ода деерән болхла, эклц классмудын сурһульчнр военокмаытн герт сурһулян дасчана. Мана үүдәгч баг Көтчнр селәнд ирсн кемд, бичкдүд үвлин амрлһнд бәәсн бәәж. Болв удл уга эклц школ шинрүлгдсн герт нүүж орх. Январин хөрнд эн школ байрин бәәдлд секгдх. Федеральн программар аварийн школ ясхин төлә дөрвн сай арслнг йилһж өгв. Урднь арвн зурһан сай арслнг өгх зура билә. Тегәд йилһж өгсн мөнгәр зуг дула өглһнә систем, газин сурвлж, электросунһуг, терз-үүдн сольгдв, актов залд капитальн ясвр кегдв, тер мет школын герин дотр шалдарин көдлмш бас күцәгдв. Болв герин ора болн герин һаза ясврин көдлмш кедг мөнгн күртсн уга. Көтчнрә района администрацин аппаратын һардач Галина уланован келсәр, танһчин аварийн школмуд ясхин төлә федеральн бюджетас хөрн дөрвн сай арлснг йилһж өггдв. Эн мөнгин тнһчин хуучн тавн школын ясврт йовулв.
Колдан Наталья, Хулхачин Николай
