Эндр дотр дундын кергүдин министр Баатр Гиндеев журналистрла пресс-конференц кев
Январин нег шинд сөөһәр Хар Һазра района аһуд полицин көдләч кү алв гиж харлгдад бәргдв. Ода эн зеткртә йовдлын туск керг мөшклһнә заллтд орулж өггдв. Энүнә тускар эндр дотр дундын кергүдин министр Баатр Гиндеев журналистрла болсн пресс-көнференцд зәнглв. Прикумский селәнә бәәрн күүкд күн полицин әнгд ирәд, эн зеткртә йовдлын тускар зәнглж. Энүнә далн тавдгч жилд төрсн көвүнь гертәсн һарад хәрж ирсн уга. Тер өдрәс авн геедрсн Лева Курбахаджиевиг полиц хәәв. Пресс-конференцин йовудт бәрәнд авгдсн күүнә тускар журналистнр соньмсв.
Министрин келсәр, полицин участкин күцц зөвтә көдләч Джамбулат Досказиев МВД-н Волгоградск академь төгсәж, давсн жилин намрар хальмг танһчин МВД-н медлд ирж көдлв. Энүг «Лаганский» нертә полицин межмуниципальн әнгд көдлмшт йовулж. Көдлмштән шоодврла харһулгдсн уга. Алгдсн күн болхла административн зака эвдәд болн хулха кеж гиһәд, һурв дәкж полицин әнгд бәргдсн бәәж. Ода эн зеткртә йовдлар мөшклһнә комитетин мөшклһнә заллт уголовн керг күцәжәнә.
