Төрскн келән делгрүлхин төлә олн сурһулин программ үүлджәнә
Хальмг келнә төр өдгә цагт онц орм эзлжәнә. Төрскн келән делгрүлхин төлә кесг керг-үүлдврмүд, сурһулин программс бүрдәгдсн бәәнә. Мана үүдәгч баг Элст балһсна 16-гч тойгта келн-улсин бичкдүдин садт одад, тенд көвүд-күүкдт хальмг келән яһж дасжахин тускар соньмсв.
Тамара Павловна Баатырова 40 жил шаху багш болж көдлжәнә. Эн цагин эргцд көвүд-күүкдт төрскн кел дасхчана. Тамара Павловнан кичәлд бичкдүд оньган өгч энүг сонсчана. Энүнә кичәлмүдт көвүд-күүкд хальмг келәр кесг шүлгүд, үлгүрмүд, туульс болн нань чигн амн үгин зөөр дасна.
Эн садт зуг хальмг келн-улсин бичкдүд биш, талын келн-улсин күүкд бас орна 6 наста Ислам Ясаев хальмг дуд дуулхдан дурта, тегәд кемр нәр наадн болхла, эн көвүн дангин шунмһаһар орлцна.
«Бамб цецг» нертә садт зуг ах насни багин бичкдүд хальмг кел дасна, балчр багин көвүд-күүкд бас хальмг келнә кичәлд орна. 2-З наста нилхстә Александра Дорджиевна Батырова көдлжәнә. Түрүн ишкдлән кежәх бичкдүд нааран ирәд, чик сурһмж авад, хальмг келән дасад, школд белдвр кежәнә.
Иим багшнрин, сурһмжлачнрин нилчәр мана дорас өсч йовх бичкдүд төрскн келән, сойлан, авг-бәрцән бийдән шингәж авч, төскнч сурһмж авх гиж ицл бәәнә.
