Эрна Самохвалован патьриг олн-зүсн ке-сәәхн кегдлмүд кеерүлжәнә

Эрна Самохвалован патьриг олн-зүсн ке-сәәхн кегдлмүд кеерүлжәнә. Тер тоод йиртмжин зургуд, орсин келн-улсин туульсар зурсн үүдәврмүд, орсин православн чонж, әрүн улсин шүтә үзж болх. Энүг урн һарта күүкд күн хатхмр кедг эрдмтә Яшалтинск района эрдмч өвәрц билгиг эврәннь экәсн болн ээжәсн шингәж авч. Билгтә күүкд күн эврәннь эрдмин нуувчарн мана үүдәгч багла хувалцв.

Намрин кемин йиртмжин алтн шар хамтхасн, ке-сәәхн мөр унсн орсин баатрмуд урн һарта күүкд күүнә кегдлмүдт әмд болж үзгднә. Эрдмч күүкд күн эврәннь үүдәврмүд кехләрн, йиртмжәс, дурта үрдүдәсн, ачнр-зеенрәсн болн шажнас үрмд-чидл авна. Эрна Самохвалован келсәр, орсин православн шүтән энүнә хамгин ик күцәмж болна. Әрүн бурхдын шүтә үүдәхләрн седклән өгч көдлнә. СНХ Эрна Самохвалован келсәр, түрүн авгтан православн чөнж зурдг бәәж. Ут-тоодан иим хөрн зург хатхв. Әрүн улсин зург кех кергтә гиж әмтн селвг өгдг билә. Түрүләд иим үүдәврмүд кехд әәдг биләв. Түрүн шүтәг күүкнәннь таньдг күүнд зурж өгч. Ода болхла эврәннь күүкдтә иим үүдәврмүд белглнә.

Келхд, Самохваловин өрк-бүлд хатхмр кедг эрдм цугтан меднә. Иим эврдмин нуувчиг үйәс-үйд хадһлж өггджәнә. Бичкн цагтан Эрна Самохвалова эврәннь экәсн болн ээжәсн иим эрдм дасж авла. Ода эврәннь күүкдтә ке-сәәхн кегдлмүд кедг дасхжана. СНХ Эрна Самоховалован келсәр, әрүн улсин зүргиг үүрмг зургар кех кергтә. Ик зургар кехлә эднә чирә геедрж одна. Тегәд үүрмг зураһар әрүн улсин зург кенә. Зәрм зургудт кесг өнг олзлх кергтә болна. Түрүн хәләцд зург амр болж медгднә. Болв энүнд жирн дөрвн өнг олзлх кергтә болжана.

Эврәннь эрдмәрн талдан улсиг байрлулхла сән болна гиж Эрна Оттовна келнә. Эврәннь үүдәврмүдән хулджахш талдан улст иим ке-сәәхн зургуд хулдж чадшго. Зуг өөрхн улстан, элгн-садндан белглжәнәв гиж Эрна Самохвалова келнә. Эврәннь эрдмән дуран болн седклән өгәд кехлә, ашнь сән болна. Дурта эрдмәрн көдлхлә, энүнд немр чидл ирнә. Тегәд талдан улст байр үүдәхлә, эннь хамгин сән белг болна гиж эрдмч келнә.