Тундутово селәнә сойлын гер хамгин сән учрежденя нер зүүв
Баһ Дөрвдә района Тундутово селәнә сойлын гер хамгин сән гисн селәнә муниципальн сойлын учрежденя нер зүүв. Ода мөнгнә мөрә шүүж авад, селәнә сойлын герт ясврин көдлмш кех арһ учрв. Энд хамгин һол төрнь герин ора шинрүлж ясх кергтә.
Тундутово селәнә сойлын гер дөчн жил хооран секгдсн билә. Энд байр болхла селәнә күсдундур минһн күн цуглрна. Ода сойлын гер ясврт хаагдв. Энд герин ора шинрүлж яслһна көдлмш кегджәнә.
Тундутово селәнә ахлач Елена Олейникован келсәр, эн жил селәнә сойлын герин ора экләд шинрүлгджәнә. Сойлыг герла ик зура темдглж авгдв. Сойлын гер экләд көдлхлә, баһчуд төрскн һазрасн нүүшго.
Сойлын герт ясвр кехинь бәрн улс дөчн жилдән күләв. Хойр минһн арвдгч жилд сойлын герин хәләһәчнрин залд ора нурад унв. Ода зал иим му дүрс һарв. Энд ясвр кехин төлә района бюджетас мөнгн йилһж өггдв.
Баһ Дөрвдә района администрацин толһач Геннадий Золочевский келсәр, танһчин толһачин даалһврар сойлын герин ясврт һурвн зун минһн арслнг йилһж өггдлә. Хамгин түрүнд герин ора сольгдв, герин һазадк эрсн шинрүлгдв. Энүнә төлә мөнгн күцц йилһж өггдсмн. Ода тосхлтын материалмуд хулдж авгдв. Герин ора шинрүлһнә көдлмш төгсжәнә. Энүнә хөөн герин дотр шалдарин болн ширдлһнә көдлмш кегдх.
Тер бийнь иим хуучн гер тундутовцнр цуг байран хамдан цуглрж темдглнә, селәнә улсин хургуд энд болна. Одахн селәнә сойлын гер танһчин муниципальн сойлын учрежденя хамгин сән учреждень гисн нер зүүв.
Тундутово селәнә сойлын герин директор Екатерина Сурикован келсәр, хамгин сән гисн сойлын учрежденя марһана ашар зун минһн арслнг мөрә авч. Болв герин ясвр кех ик төр бәәнә. Хамгин түрүн дула өглһнә систем кех кергтә. Энд цуг сойлын керг-үүлдврмүд болна. Селәнә улс байрт дурлж орлцна. Зуг энд көдлх таал уга. Үвлднь киитн болна, дула өглһнә систем көдлжәхш.
Тер мет танһчин бюджетас хойр зун тәвн минһн арслнг дөнцл мөнг авхин төлә муниципалитетин администрац документ орулж өгв. Эн мөнгиг сойлыг герин дотркиг шинрүлж яслһна көдлмшт олзлз саната. Тиигхлә хуучн гер шинүрлгдәд, энд шуугата байр нәр-наад бүрдәж давулж болх.
Елена Алексенко, Хавтхна Анатолий
