"Теегин айс" нертә бичкн дуучнрин марһанд белдвр кегджәнә
Эн өдрмүдт «Калмыкия» нертә ВГТРК-н әнг Элст балһсна эрдм-сурһулин заллтла хамдан хотл балһсна сурһульчнр дунд хальмг келәр ду дуулһна "Теегин айс" нертә марһанд белдвр кежәнә. Өдгә цагт энүнд орлцхар олн бичкн дуучнр эрлһ орулж өгчәнә. Тегәд эннь хальмг келн-улсин дууһар дорас өсж йовх бичкдүд соньсмжахнь ил герч болжана.
Элстин һурвдгч школын дөрвдгч классин сурһульч Эмилия Лиджиева уйн наста болв чигн дамшлтта дууч. Эн күүкн олн-зүсн олимпиадт орлцад, кесг дәкж диилвр бәрсмн. Келхд, Будапешт балһснд болсн Имре Кальмана нертә нарта-делкән марһанд вокал номинацд негдгч мөрә шүүж авла. Танһчин дөрлдәнд болхла, өргн хуурин Триумф нертә мөрәһәр ачлгдсмн. Давсн жилд Туапсе балһснд болсн нарта-делкән марһанд дөрвн өргн хур татдг күүкн, тер тоод Эмилия сән үзмж бәрлә. Эврәннь дурта ээжтәһән, бас билгтә дууч бичкн күүкн һурвн настаһасн авн олн-зүсн концертд орлцдг билә. Ээжнь эврәннь ач күүкндән хальмгин көгжмин сойлд дурта болх сурһмж өгв. Элстин һурвдгч школын дөрвдгч классин сурһульч Эмилия Лиджиеван келсәр, хальмг келнә багш Ирина Убушаевна иим марһанд орлцх селвг өгч.
Иргч телевизионн марһанд онцар дуулһна номинацд эврәннь школын нериг Эмилияла хамдан тавдгч классин сурһульч Алина Кукаева болн арвн негдгч классин сурһульч Наталья Максимова харсх.
Алина болн Наталия келсәр, ду дуулдг эрдмәр эдн минь одахн экләд соньмсдг болв. Эднә дуулсн хальмг дуд йир енгсг сән кевәр дуулгдна.
Марһанд орлцх зун күүнәс эдн цугтан түрүн шүүврин деснгд дииләд, цаарандан дөрлдх арһ бәәнә. Эдниг СМС-ин эв-арһар шүүж авх. Тавн күн орлцата шишлнг жюриг танһчин нертә композитор Аркадий Манджиев һардхмн. Онц келхд, эн дөрлдәнд билгтә цуг бичкдүд орлцж чадх. Элст балһсна мэрийн эрдм-сурһулин заллтин ах специалист Булһн Ангирован келсәр, иим марһан бичкдүдин билг делгрүлнә, хальмг кел тархалһнд сән нилчән күргх.
Көгжмин дөрлдәнд орлцсн олн-зүсн наста бичкдүд сән билг-эрдмән үзүлж чадх. Дөрлдән хойр сарин эргцд болх. Энүнә йовудт хәләһәчнр СМС илгәһәд, эврәннь шүүврән кеж чадх. Жюри болхла мартын чилгчәр, дииләчин нер заах.
Хавтхна Элла, Хулхачин Николай
