Танһчин һурвн һарц» өөнән темдглхәр белджәнә
Эн өдрмүдт Хальмг танһчин һурвн һарц өөнән темдглхәр белджәнә. Ода Әрәсәд бичкдүдин төлә һарц баһар һарчана. Зуг арвн долан регионд иим бар барлгджана. Тер тод мана танһчд. “Баир” журнал, “Байрта” газет болн “Теегин герл” журнал өвәрц һарц болжана. Энүнд барлгдсн материалмудыг номтнр, сурһульчнр кесг жилдән олзлжана. Бичкдүдин һарцд болн “Теегин герл” журналд барлгдсн номин статьяс, келврмүд, шүлгүд багшнрт болн бичкдүдт сән дөн болжана. Иим һарц хулдж авхд күн болна, тегәд эдниг библиотект умшж болх. Иргч ончта өөн йоста ик байр болх.
Элст балһсна цутхлнгд Барин герин зурһадгч давхрт танһчин барин һурвн редакц бәәнә. Эн жил Хальмгин барин хамгин хуучн “Теегин герл” журнал найн тавн жилин өөнән темдглх. Жил ирвәс журнал сольгдад шинрәд йовна. Энүнд сән үүдәврмүд барлгдна. Энүнә зун хөрн нәәмн халхд эврәннь үүдәврмүдән шүлгчнр, бичәчнр, туужин номтнр болн зурачнр барлхдан дурта. Литературн альманахд олн-зүсн рубрик бәәнә. Эннь журналыг өвәрц чинрәр кеерүлнә.
Тер мет ноябрь сард “Байрта” гаезт арвн жилин өөнән темдглх. Энүнә редакцд дөрвн күн көдлжәнә, зәнгчнр, редактор болн дизайнер. Сард нег дәкж газетин нег минһн хойр зун тәвн умшач шин һарциг күләж умшна. Теднә тоод сурһульчнр, эднә эк-эцкнр болн багшнр. Олн-зүсн наста улсиг негдүлһнә төр газетин көдләчнр хаһлжана. Эднә тоолврар, газет өрк-бүлин һарц болх зөвтә. Энүнд күн болһн бийдән тааста материал олж авх зөвтә. Иргч жиләс авн Байрта газет шинрүлгдх. Өдгә цагин янзар газет хойр минһн нәәмдгч жиләс авн һарчана. Удл уга дөчн халхта ке-сәәхн олн-зүсн соньн рубрикта газетиг умшачнр авх.
“Байрта” газетин ах редактор Светлана Михайлован келсәр, иргч жилд шин һарцд өрк-бүлин халхд “Переменка” нертә рубрик һарх. Бичкдүдин бичсн материал барлгдх. Цугинь тускар нуувч келж болшго. Дала рубрик һарх. Бичкдүдлә залһлда бәрх санан бәәнә.
Танһчин умшачнр дәкәд нег һарц “Баир” нертә бичкүдин журналыг сәәнәр медж дурлж умшна. Журнал хөрн тавн жилдән һарчана. Энүнә һадртнь хальмг хувцта көвүн зурата.
Бурата поселкин бәәрн күн Алдр Кекешкеевин келсәр, бичкнәсн авн эн журнал умшна. Энүнд сән материал барлгдна. Экнь умшж өгдг бәәж. Энүнә тәәлвртә туульс, келврмүд халмьг келәр умдг билә.
Хар Булг селәнәс ирсн Данзн Горяевин келсәр, энүнә үрдүднь Байр журнал умшх зөвтә.
“Байр” журнадын түрүн тойгнь нег минһн йисн зун найн йисдгч жилин январь сард барас һарв. Тиигхд цуг көдлмшиг һаран кедг бәәж. Энүг Әрәсән бичәчнрин болн зурачнрин ниицәнә гешүд, монһл яста улсин бичкдүдин бичәчнрин нарта-делкән мөрән лауреатнр Николай Санджиев, ода ачта амрлһнд бәәх Федор Дубров болн ода көдлжәх художественн редактор Сергей Бадендаев экләд кесмн.
Сергей Бадендаевин келсәр, журналын материалыг сәәнәр кеерүлх кергтә. Энньйир дааврта көдлмш. Журлан ямаран болна, тиим кевәр бичкдүд өсх.
Келхд, ода Әрәсәд бичкдүдин һарц зуг арвн долан регионд барас һарчана. Хальмг танһчд болхла иим хойр һарц бәәнә.
“Баир” журналын ах редактор Зоя Эрдниеван келсәр, мана зәнгчнр, зокьялчнр умшачнр болжана. Журналд эдн оньдин бичнә. Бичкдүдин үүдәлт барлгдна.
Һурвн ончта өөн. Эн жилин танһчин умшачнр һуврн ик өөн темдглх. Эннь умшачнрин дурта газет-журналмудын өөн болжана.
Хавтхна Элла, Котина Валерий
