Танһчин премьер-министр Лаганск районд одв
Танһчин правительстин ахлач Игорь Зотов Лаганск района зәрм обьектмудт одв. Эн саамд йирн тавдчг жилд тенгсин усн деврәд, аюл болснас көлтә гермүд уга үлдсн улст бәәдг гер тосгджах комплекст одв. Жилишн төр энд "Юг России" нертә федеральн шишлнг программар хаһлгджана. Тер мет мана танһч бас энүнд эврә тәвцән орулх зөвтә. Танһчин хазнас йилһж өггдх зун сай арслнг мөнгн хату девскртә хаалһ тосхлһнд йовулгдхмн.
Зотовин келсәр, эн төр хаһлхин төлә кергтә мөнгн йилһж өггдх. Негдгч тойгта эрдмин лицейд премьер сурһулин йовудар соньмсв. Райна активла болн нефтин компаня элчнрлә болсн харһлтд Лаганск района делгрлтин болн кесг жилдән района улсиг үүмүлжәх төрмүд яһж хаһлхин тускар күүндвр кегдв. Лаганск района улсиг сән чинртә уудг усар тетклһнә төрт Игорь Зотов онц оньг тусхав.
Түрүн болж танһчин правительствин ахлач Игорь Зотов Красинск усна боодг хәләв. Эндәс Лаганск района бәәрн әмтн уудг усар теткгднә. Ода болхла эдн уудг усн уга үлдх әәмшг бәәәнә. Юнгад гихлә, Каспийск усна системин насосн станц эвдрәд хуучрв. Тегәд чигн электрокүчнә өр данцах мөнгн федеральн бюджетас йилһж өггдсн уга. “Калммелиоводхозин” Каспийск филиалын директорин үүл даажах Зоя Очирован келсәр, сүл насон эвдрәд, эдлврәс һарв. Эдн зуг өрәл кубометр ус өгчәлә, урднь гнег кубометр ус сөрж авдг бәәсмн.
Специалистнрин келсәр, ода энд хөрн хонгт күрх усн үлдв. Насосн станц көдлхин төлә долан сай арслнг кергтә болжана. Района әмтнлә харһад күүндсн цагт премьер Игорь Зотов эн төр хаһлхин төлә мөнг йилһж өгхән медүлв. Премьер-министр Игорь Зотовин келсәр, эн төр хаһлхин төлә дала мөнгн кергтә биш. Энүг танһчин эс гиж федеральн бюджетас йилһж өггдх. Удл уга усна төр хаһлгдх. Зунын кем күртл эн төр күцц хаһлгдх.
Тет саамд Красинск боодгин усна кемжән баһрснас көлтә района улсиг теткжәх уудг усна чинр муурв. Усна үнр му гиж бәәрн улс келнә. Коммунальн халхин предприятин ах инженер Ирина Джигульская келсәр, уудн усна чинр му гиж лабораторн шинжлтын ашт медгдв. Ус цеврлдг сооруженьс һучн жилдән эдлврт бәәнә. Тегәд эдн хуучрад эвдрв. Энүг шинрүлж ясхин төлә мөнгн уга. Шин эв-арһсин төсвәр уудг усна чинр ясрх, электрокүчн әврлгдж олзлгдх. Ах инженер Ирина Джигульская келсәр, станц шинрүлж яслһан программд орла. Хойр жил хооран хлорин ормд талдан реагент олзлх шиидвр авгдв. Зуг усна кемжән икәр дорагшан орснас көлтә эн көдлмш кегдсн уга.
Лаганцнр дәкәд нег төрин тускар танһчин правительствин ахлачд келв. Эннь Лагань-Улан Хол цувгиг бәәрн поселкд техническ ус өглһнә төлә олзлх кергтә. Поселкин әмтн зөөврин уудг усар теткгджәнә. Иим хурц төр эдниг жирн жилдән үүмүлжәнә. Һурвн жил хооран тохгдсн обьектиг энүг хәләж ясх организацин медлд орулж өгч чадсн уга бәәж. Кемр цувгиг "Калмелиоводстрой" предприятин медлд өгхлә, энүг шинрүлж яслһна төлх мөнгн федральн бюджетас ирх. Лаганск района администрацин ахлачин негдчг дарук Юрий Когаевин келсәр, ода мана һол күцлнь — эн цувгиг әрәсән селәнә эдл-ахун министерствар дамжулад "Росмелиоводхозин" медлд орулх кергтә. Тиигхлә эдн энүг шинрүлж ясх, федеральн мөнгн ирхмн. Ода зурһан насос белн бәәнә. Эдн Джалыковин станцд углж тәвгдв.
Харһлтын йовудт селәнә улсин үүмлжәх цуг төрмүд хәләгдж, эн туст кергтәм өнгнә кемжән тоож һарһгдв. Эн хурц төрмүдиг яһж халһхин утск шиидврмүд батлж авгдв. Эннь района улст хамгин һол керг болжана.
Ээнән Ольга, Бадмаран Владислав
