Зурач Валерий Монтышевин санлд нерәдгдсн самбр секгдв
Нег жил хооран Хальмгин дүрслгч искусствин билгтә үүлдәч Валерий Монтышев сәәһән хәәсн билә. Энүнә бәәсн герт Элст балһснд мемориальн самбр углж тәвгдв. Пальмовин нертә келн-улсин музейд “Благословение” нертә танһчин искусствин ачта үүлдә әрәсән зурачнрин ниицәнә гешүн Валерий Монтышевин үүдәврмүдин һәәхүл секгдв.
Валерий Монтышевин үүдәврмүд дунд “Встреча Аюки хана с Петром 1”, “На земле предков”, “Благословение” нертә зургуд хамгин ончта көдлмш болжана. Хальмг танһчин дүрслгч искусствин хамгин билгтә үүлдәч эн өдрмүдт дигтә жирн нас зүүх бәәсмн. Зурачин өөрхн улснь, элгн-саднь Монтышевин санлыг мөнкрүләд, энүнә бәәсн герт мемориальн самбр углж тәвгдв. Зурач, мемориальн самбрин зокьялч Юрий Мазуровин келсәр, зурач Монтышев хальмгин дүрсгч искусствд ик тәвәцн орулад, эврә онц орман эзлв. Эндр бидн энүнә санл мөнкрүлж, күндлжәнәвидн.
Эн өдрмүдт Пальмовин нертә келн-улсин музейд “Благословение” нертә Валерий Монтышевин үүдәврмүдин санлын һәәхүл секгдв. Нааран ирсн улсин оньгт музейин көрнгин болн эздүдин хуранһун зургуд тусхагджана. Монтышевин зург болһн туужин нег халх болн мана бәәдл-жирһлин тасрха гиж меморилан самбр секлһнд орлцсн улс темдглв. Скульптор Владимир Васькина келсәр, хальмг улсин сойл мөнкинд туужд үлдх зөвтә, туужд эврә онц орман эзлжәнә. Иим әмтн келн-улсин туужд мөнкинд үлдхмн.
Монтышевла хам-хоша бәәсн күүкд күн Вера Бадмаеван келсәр, Валерий билгтә зурач болсн деерән, сән зангта күн билә. Цаһан седклтә болн һольшг зангта күн эврәннь шин көдлмшин тускарболн соньн йовдлын тускар оньдин келж өгдг бәәсмн. Медәтә улсиг оньдин күндлдг билә гиж Вера Бадмаева келнә. Вера Бадмаеван келсәр, оньдин маднла мендләд, яһж бәәнәт гиж сурдг билә. Альдаран одсна тускар келж өгдг бәәсмн. Монһлд, Сиврт, Москвад одсна тускар келж өгдг билә.
Өдгә цагт билгтә зурачин үүдәврмүд әрәсән болн һазадын ордудын олн-зүсн музеймудт болн Германя, Монhлын, Китдин Америкин болн Францин эздүдин хуранһуд бәәнә. Валерий Монтышевла әдл әмтн хальмг улсин өвәрц сойлыг хол һазрт туурулжана. Билгтә зурачин санлыг энүнлә үүдәврмүдлә хамдан өөрхн улснь эврәннь зүркндән мөнкинд хадлһх.
Бевина Мергн, Бадмаран Владислав
