Светлоград балһснд хальмгин салдс оршагдв гиж бәәрн улс келнә
Дигтә далн жил хооран Хальмг танһч немшин цергәс сулдхгдсмн. Энүнд зун арвдгч салу Хальмгин мөрнә дивизь орлцсна тускар мана танһчин межә һатц бәәх улс сәәнәр меднә. Светлоград балһснд салдсин оршавр бәәнә. Бәәрн улсин тоолврар, энүнд хальмгин салдс оршагдв. Энүнлә туужин номтнр зөвшәржәну аль угай?
Элст балһснас Ставрополь балһснд күрдг хаалһар йовхла, Светлоград балһснд эргәд орсн цагт модн заагт күүнд түрүн хәләцд үзгдшо бичкн бумб бәәнә. Светлоградск туужин музейин директор Антонина Никонован цәәлһсәр, Петровское селәнә бәәрн улсин келсәр, энүнд зун арвдгч хальмгин дивизин кавалеристын оршавр бәәнә. Дәәнә цагт иим Светлоград Петровское гисн нер зүүжәсмн. Харм төрхд, салдсин документ болн медальон олдсн уга гиж Антонина Федоровна һундлтаһар келнә. Ода Светлоградын аһуд тавн бумб бәәнә. Эднәс һурвнь нерн уга дәәчнрин бумб, негнь Волгоградск областин дәәчин оршавр, нег мемориал Саран афанасьевич Ивановичд нерәдгдж.
Туужин музейин директор Антонина Никонован келсәр, бәәрн улсин тодлсар эн һазрт һурвн салдсн немшнрлә дәәлдж. Эдн нег-негән харсад, негнь үлдәд әмнәсн хацһж. Асхлад комендатск час төгсхлә, бәәрн әмтн салдсиг оршаж. Энүнд медальон билә. Эднә келсәр, эн салдс зун арвдгч дивизин дәәч.
Туужин номин доктор Уташ Очировин цәәлһсәр, дөчн һурвдгч жилин январин хөрн хойрла зун арвдгч хальмгин мөрнә цергин дивизин салдснр Городовиковск района аһуд немшнрлә дәәлдв. Эн өдр Хальмг танһчин һазрас немшнрин церг көөгдсмн. Тегәд Светлоград балһснд мана цергчнр бәәснь маһд. Туужин номин доктор Уташ Очировин келсәр, тер цагт Башнт селәнд дәәлдән болв. хальмгин дивизин нег әнг онц даалһвр күцәсн болхла, хальмгин салдснр тенд одсн болх. Зуг эннь маһд.
Болв эн оршаврин туск дәәнә цагин тодлврмудыг Светлоградын әмтн ода күртл мартсн уга. Сүркә дәәлдәнд әмнәсн хаһцсн салдснриг болн офицермудыг оршадг күн уга болдг билә. Городовиковск балһснас эн һазр күртл зуг зун дөнч дууна. Музейин көдләчнрин келсәр, зун арвдгч хальмгин мөрнә цергин дивизин салдсин зәрмнь Петровское селәнд күрәд, энүг немшнрәс хасрж авсн болх.
Гольдина Ирина, Хавтхна Анатолий
