Сурһульчнрин олимпиад болв
Сурһульчнр экологин медрлән үзүлв. Элст балһснд бичкдүдин немр сурһулин халхар эколого-биологическ танһчин номин олимпиад болв. Энүнд райодт шүүврин девснгд диилвр бәрсн көвүд-күүкд орлцв.
Троицк гимназин арвн негдгч классин сурһульч Байр Балтыков иим олимпиадт хойрдад орлцжана. Энүнә келсәр, марһан даалһвр дегд күнд биш, энүнәс немр медрл авч болна. Давсн жилд региональн олимпиадт Баир түрүн орм эзләд, цугәрәсән марһанд Хальмг танһчин нер харсв. Энүнд цуг регионмудас хойр зун тхвн көвүн-күүкн ирж орлцв. Баир нәәмдг орм эзлв. Эн жил олимпиадт Булгин жирһл нертә төсв белдв. Энүг белдхин төлә дала цаг кергтә болв.
Баир Балтыковин келсәр, ода Хальмгт ода әмтн бәәдг аһун, сән чинртә һазрин болн уудг усна төрмүд хурц. Һазрин булгас ус авч болх. Энүг цеврләд ууж болх. Һазр дорас шишлнг оборудованяр ус гермүдт орулж болжана.
Ут-тоодан олимпиадт танһчинц уг райодас һучн дөрвн сурһульч эврәннь программан үзүлв. Түрүн девснгд даалһвр бичх кергтә билә. Багшнрин келсәр, иим көдлмшт көвүд-күүкд эврәнь медрлән медүлнә, тер тоод биологин, экологин болн төрскн һазриннь хурц төрмүдин тускар бичнә. Эн сурһульчин келсәр, олимпиадт тохнята белдвр кеж. Школын хөөн дала дегтр умшж. Эн күүкнә келсәр, даалһвр күнд болв. Зуг соньн. Хамгин икәр хойрдгч даалһвр таасгдв. Энүнд бичәд хәрү өгх кергтә билә.
Бүрдәһәчнрин келсәр, олимпиадын һол күцлнь — баһчуд дунд медрл тархалһна, сурһульчнрин үүдәгч билг делгрүлһнә, номин болн шинжлтын үүлдврәр соньмсулһна төр тәвгджәнә. Тер мет көвүд-күүкд хоорндан дамшлтарн хувалцна.
Эколого-биологическ цутхлнгин методист Гульнара Буваеван келсәр, жил ирвәс олимпиадт орлцачнрин то өсәд йовна. Давсн жилд арвн сурһульч орлцла, эн жил болхла һучн дөрвн көвүн-күүкн дөрлдв.
Танһчин олимпиадын ашар Хар Һазра, Ик-Буурла болн Целинн райодын сурһульчнр дииләчнр болв. Ода эдн эврәннь көдлмшән цугәрәсән марһанд үзүлх. Кемр тенд танһчин билгтә көвүд-күүкд призермудын тоод орхла, эдн Эрдм-сурһуль нертә төсв күцәлһнә билгтә баһчудыг дөннлһнә мөрәһәр ачлгдх.
Ээнән Делгр, Котина Валерий
