Шин жилин байрт олн әмтн белдвр кежәнә

Шин жилин байр күртл һурвн долан хонг үлдв. Энүнд белдвр кехин төлә цаг бәәнә. Болв хамгин дурта байран яһж тосхин тускар оданас авн ухалх кергтә. Советин йосна цагт байрт әмтн ик эртәснь хот-хоолан, белглх белгән хулдж авдг бәәсмн. Өдгә цагт болхла, әмтнә ик зунь байр күртл хойр-һурвн өдр үлдхлә, магазид эргж хулд кенә.

Эн өдрмүдт Элст балһсна магазидт шин жилин байрин олн-зүсн кеерүл олра хулдгджана, һаза болхла хулд-гүүлгәнә палаткмудт шин жилин байрт өмсдг ке-сәәхн хувц хулдж авч болх. Хулдачнрин келсәр, эн жил бичкдүдт шин жилин байрин нәр-нааднд мушкетер эс гиж бэтман болх саната. Ольга Арутюнян болхла эврәннь Аня күүкндән иржәх жилин темдг лууһин костюм хулд авхар шиидв. Келхд, эдн эн жил шин жилин байриг түрүн болж Хальмг танһчд тосхмн. Ольга Арутюнян келсәр, әәдрхн балһснас ирж. Элст балһснд шин жилин байр өөрдж йовхнь ил үзгднә. Эннь мадниг байрлулжана гиж ольга келнә.

Ольгала әдл улс ода баһ болх бәәдлтә. Ода Хальмг танһчин әмтн талдан һазрт одад, байр тосх саната. Шин жилин байр ямаран һазрт тосхла, тенд байр давулх йорт әмтн иткжәнә гиж туристическ нег фирмин директор шоглж келнә. Эндр өдрт эн компань һазадын ордудт одад амрх далн путевк хулдв. Туристическ компаня фирмин директор Надежда Нестеренко келсәр, Элстихн эн жил Финляндин, Египетин, Индин дулан һазрт одхдан дурлжана.

Келхд, иим хол һазрт одад, амрх арһ цуг улст уга. Элст балһсна әмтнә ик зунь ода шин жилин байрт белдвр кеж, белг хәәж авчана, хот-хол хулдж авна. Шин жилин байрт белдхин төлә зурһан долан минһн арслнг кергтә. Белг урдаснь хулдж авх кергтә. Байрин өмн өргнд эд-тавр болн хот-хол үнтәрж одна.

Ирх байриг олн улсла хамдан тосх саната улст Элтс балһсна ресторатормуд нәр-наадна ик программ белджәнә. Иим кевәр амрхин төлә хайсн бийнь хойр минһн арслнг кергтә. Ресторана менеджер Тимру Болдыревин келсәр, сүл өдрмүдт олн улс ирәд, ресторанд шин жилин байр тосх орм эзлжәнә. Олн гиичнр ирх бәәдлтә. Шин жилин программ белдгджәнә. Энүнә тускар аода келхд эрт болн нуувч.

Ресторана үн декабрин ичлгәр невчк кимдрнә. Эн кемд предприять-организацсин көдләчнр хамдан байр тосна. Тегәд эдн бүкл коллективарн ирнә. Театрмудын актермудт болхла бас көдлмш дала. Ирх байрт эдн бичкдүдин төлә байрин программ үзүлнә. Артистнр бичкн көвүд-күүкдин нәәрт одна, школмудт болдг елкин байрт орлцна. Баснга Баатрин нертә театрин диреткорини дарук Елена Менкенован келсәр, артистнрин шишлнг бригад эн саамд көдлх. Киитн Аав, энүнә ач күүкнь, лу, аю школмудт болн олн организацд одад, шуугата нәр-наад бүрдәх. Сурһульч болһн далн арлснг өгх зөвтә, организацд зун арлснг күрчәнә.

Шин жилин байрин бичкдүд болн бөдүн улс әдл байрлж тосхдан дурта. Эн туст ямаран тенгрин бәәдл тогтхнь бас ик чинр зүүнә. Синоптикүдин тааврар, декабрин чилгчәр аһарин кемжән киитрәд. арвн тавн-арвн долан градуст күрх.

Кемр шин жилин байрт цасн икәр эс орв чигн, шин жилин байран сергмжтәһәр тостн. Декабрин һучн негнд сө арвн хойр часла тана сансн күсл эрк биш күцх. Олн әмтнә хамгин дурта байр күртл һурвн долан хонг үлдв.

Санкун Кермн, Колдан Церн