Селән һазрур әмтн хәрү нүүж иржәнә
Ик кезәнәс авн улан залата хальмгуд у-өргн теегт дөрвн зүсн малан идшүлж өскж йовсмн. Хальмгуд эргндк аһуг харж хадһлж, энүнлә зөвшәрж бәәсмн. Өдгә цагт, харм төрхд, эн халхар уул авьяс-зангшал мартгдад геедржәнә.
Владимир Эрднеев бичкн цагасн авн эк-эцкдән гертә мал өскхд сән дөн болдг бәәсмн. Хөөннь арвн жилдән Шин мер фермин һардач болж көдлв. Болв энүнә хөөн тогтсн учрар Яшалтан районд нүүх кергтә болв. Болв төрскн, өсәд боссн һазран санад, гейүрдәд бәәв.
Тегәд хәүр Шин Мерт ирәд, улана залата хальмгудын уул авьяс сергәж мал өскхәр седв. Иим көдлмш угаһар яһж цаарандан бәәхән медж чадсн уга. Ода энүнә малын хошт үвлин кемд белдлһнә көдлмш гүргүдән. малчнр бәәдг герән эврәннь чидләрн ясж авч. Иргчдән шин гер бәрж авад, хальмг тохма бод мал хулдж авх санан бәәнә. Цуг хоршасн дамшлтан болн эдл-аху яһж бәрхин туск эрдмиг эврәннь отхн көвүн Эрдньд өгхәр шиидв. Селән һазрт көдлжәх әмтн иим кеәвр баһчудт иргч үйнрт хоршасн байн дамшлтан үлдәх зөвтә.
Авалиннь седвәриг Цаһан Бовушевна байрлж дөннв. Эн күүкд күн бичкн цагасн авн бас мал яһж өскхинь меднә. Энүнә эцкнь Борис Дорджиевич Очиров Хальмг танһчин нертә малч, Социалистическ күч-көлснә Геройин нер зүүсмн.
Өдгә цагт баһчуд малд орж көдлхдән дегд икәр дурлжахш. Селән һазрт көдлмш уга болад, больниц, клубмуд болн талдан чигн социальн таал уга болснас көлтә эдн балһснд одад, көдлмш хәәнә. Болв Шин мер селәнд болхла эн туст бәәдл ясржана. Татьяна Эрдниева болхла энд дөчсн жилдән бәәршлжәнә. Энүнә келсәр, баһ саһар әмтн нааран хәрү нүүж иржәнә. Селәнд ода көдлмш уцга болв чигн, гертә мал бәрхлә, амн тоста болна гиж эн келнә.
Шин Мер селәнд урһа модд дала, тер мет зер-земшин модн чигн сәәнәр энд урһна. кеер һарад цевр аһар киилхд сән. Цаһан Булгин усн болхла оньдин киитн болн әмтәхн болна. Үвлднь булг көрхш. Әмтн бүкл жилдән энүнәс ус авчана. Владимир Эрднеевин седвәрәр эн булгиг ясад кеерүлв. Селәнә захд төрскән харсгч дәәнд орлцсн улст бумб тәвгдв. Болв Шин мерин хамгин әүрн һазрнь — гегәрлтин суврһн болжана. Энүг селәнә улс эврәннь мөнгәрн тосхв. Тегәд селән һазрт иим седхәврч улсла бәәхлә, энд ямаран күнд цаг болв чигн жирһл унтршго, һулмтын һал оньдин падрад бәәх.
Ээнән Ольга, Хулхачин Николай
