“Россия 10” нертә марһан цаарандан болжана
“Россия 10” нертә марһана шүүврин девснгин аш диглх цаг күртл дигтә хойр долан хонг үлдв. Ода Хальмг танһчин цутхлнг хурл Бурхн Багшин Алтн сүм Әрәсән шин темдгин нер зүүхин төлә болжах марһанд хамгин сән гисн тавн ормин тоод йовна. Энүнә төлә һурвн зун минһн күн дууһан өгв. Әрәсән Өмн үзгин федеральн округд хальмгин хурлын комплексла хамдан түрүн ормин төлә Волгоград балһснд бәәх Мамаев курган ноолджана. Дәкәд нег тодлад келхлә, иим марһа "Россия 1" нертә телеканал болн Орсин географическ ниицән күцәжәнә. Марһана һол күцлнь — Әрәсән имидж өөдлүлһн болн туризмин халхар мана орн-нутгт онц оньг өглһн болжана. Марһан һурвн шүүврин девснгәр болх. Энүнә аш сентябрин хөрн йиснд диглгдх. Ода дууһан өглһн цаарандан болжана. Дөрлдән мартын хөрн тавнд эклсмн. Июлин нег шинд марһана бүрдәһәчнр хойрдгч девснгд орх обьектмуд заахмн. Ода марһанд Әрәсән регионмудын архитектурин, туужин, сойлын найн бумб орлцжана. Түрүн девснгд долан зун обьект орлцв.
