Роспотребнадзор китдин әәмшгтә наадһас илткж авв

Элст балһснд Роспотребнадзорин специалистнрин кесн бүртклһнә ашт әәмшг угаһар олзлх шишлнг цаасг уга Китдин наадһас илткгдв.Бүртклһнә ашт Элст балһсна зарһд йовулгдв. Зарһин шиидввәр, әәмшгтә бичкдүдин наадһас уга кегдв.

Арвн дөрвн минһн арслнга хойр зун нертә худл наадһас Элст балһсна хог-бог асхдг һазрт авч одад, шатагдв.Специалистнрин келсәр, һурвн нас күрәд уга бичкдүдин наадһас хамгин әәмшгтә, юнгад гихлә бичкдүд иим наадһасиг амндан авда наадна. Эн кегдлмүд хорһлжн болн талдан чигн әәмшгтә элемент ордг хорта ширәр будгдна. Иим наадһасас көлтә бичкдүд олн-зүсн гемтх әәмшг бәәнә, тер тоод ки давхцдг, элкнә болн геснә гемәр гемтнә.Зәрм наадһаст үүрмг хадасн бәәнә.Сүл цагт магазидт болн базрт олн-зүсн һазрас авч ирсн наадһас хулдгджана.Эднә ик зунь государственн кемжәнлә ирлцжәхш.Дәкәд болхла һазадын ордудас худл болн контрафакт продукц авч ирж хулдгдна. Элст балһсна Роспотребнадзорин ах специалист Евгения Шашлиеван келсәр, ут-тоодан бидн зурһан бүртклһ келәвидн.Энүнә ашт хулдгджах наадһасин далн-найн процентнь Китдин орн-нутгас авч ирсн әәмшг угаһар олзлх шишлнг цаасн уга бәәж.Эднәс зуг зәрминь Әрәсәд, Беларуссьт болн Польшт кеж һарһсн бәәж.

Бичкдүдин төлә олар хулдгджах эв-таврас му чинртә наадһасиг яһж йилһж авхмн? Специалистнрин келсәр, негдвәр, наадһас ямаран чигн үнр уга болх зөвтә.Дәкәд болхла бичкдүдин төлә наадһасиг базрт эс гиж һаза хулд кежәх улсас хулдж авх керг уга. Евгения Шашлиеван келсәр, иим кимд Китдин продукциг мана әмтн дурлж хулдж авна гиж арһлачнр келнә.Тегәд иим продукц олар авч иргднә. Талдан орн-нутгт кесн наадһас үнтә.энүг баһар хулдж авна.Нурһлж әмтн кимд китдин эд-тавр хулдж авна.

Бичкдүдин эд-тавр хулджах арһлачнр әәмшг угаһар олзлх шишлнг документ угаһар наадһас хулдна. Кемр тадн иим наадһа хулдж авхдан алмацлжахла, иим эд-тавр бичгә хулдж автн. Болв әәмшгтә наадһа хулдж авсн болхл, тер дарунь Роспотребнадзорт одх кергтә.

Бевина Мергн, Бадмаран Владислав