Элст балһснд эзн уга зерлг нохас олн болв. Эдн әмтнд ик әәмшг учражана
Сүл цагт һаза йовсн әмтиг ноха зуусн йовдлмудын тө өсжәнә.Зәрмдән улсиг эзнә нохас зууна. Иим эздүд эврәннь нохасан хәләвр угаһар үлдәһәд, дурта анг уга үлдх әәмшг бәәнә. Элстин әмтн болхла нохаһас зуулһхх әәмшгтә бәәнә. Ода Хальмг танһчд зерлг ноха-мис бәрдг шишлнг һазр уга. Тегәд чигн эдниг СпецАтх көдләчнр бәрж авад, унтулна. Иим кевәр ноолда келһнә өршәнһү секдлтә йовдл биш. Болв арһ уга, һаза гүүж йовсн олн нохас әмтнд ик әәмшг учражана.
Элстин уульнцд олн ноха өдр болһн үзж болна.Эднә ик зунь күүнд әәмшг учражахш. Тер бийнь әмт зуусн йовдлын тускар зәнг һарч ирнә. Мария Григаг һал өдрәр хулд-гүүлгәнә базин өөр ноха зуув. Эн ноха ээнә бәәж. Мария Грига келсәр, санамр йовж авсн бәәж. Генктн ноха көләснь зуув.Икәр цусн һарв.
Эн зекткртә йовдл цөн сар хооран учрв. Болв көлднь шав үлдв, тер мет күүкд күн икәр әәһәд, ода күртл тер өдриг сәәнәр тодлна. Тегәд пенсионерк им зовлнг үзссн төләд, данцалһна мөнг авх зөвтә. Элст балһсна прокурорин дарук Асмик Арутюнян келсәр, эн йовдлар бидн зака эвдсинь илтквидн. Ноха медәтә күүкд кү зуусн бәәж.Энүнд һурвн минһн арслнг эзнь өгв.
Нохан эзнь эврәннь гемән медәд, данцалһна мөнг эврә дурар өгв.Болв һаза эзн уга гүүж йовсн ноха-миисин тускар кен дааврнь авхмн? СпецАТХ көдләчнрин келсәр, эзн уга нохас әмтнд әәмшг учражана. СпецАТХ директорин үүл дав зуур даажах Александр Аджаевин келсәр, әмтнәс ирсн эрлһәр, нохас бәрж авад, эдниг унтулад, хөөннь малын үкәрт күргж хайнавидн.
Ода шин зокалар олна һазрт ноха эс гиж мис шөрг, күзүвч болн жола угаһар йовхла эс гиж эзн угаһар һаза йовхла иим ноха болн мис эзн уга зерлг гиж тоолгдх зөвтә. Тегәд нохаһан сәәнәр эс хәләдг эздүд дурта ноха уга үлдх әәмшг бәәнә.Тодрхаһар энүнә тускар мана өдрә һарцд хәләж болх. Ода Элтс балһснд эзн уга нохас-миисиг бәрж авлһна көдлмшиг СпецАТХ күцәжәнә.Эн организацин көдләчнр шөрг, күзүвч болн ноха үзхлә, энүг унтулх. Ноха бәрж авдг көдләчнр кииһин бу болн шишлнг хорта дротик олзлна. Иим хор орулсна хөөн, ноха нег минут болад үкж одна. Жил болһн энүнә төлә Элст балһсна мэрий зурһан зун минһн арслнг йилһж өгнә.Иим ик мөнг һарһж өгснь бас учрта. Юнгад гихлә, эзн уга зерлг нохас хальдврта гем тархаһад, әмтнд әәмшг учрана. Малын гемлә ноолда кедг станцин ахлач Владимир Кухниновин келсәр, һаза гүүдг зерлг нохас олн-зүсн гем тархана, тер тоод яшур, маальг гем тархах әәмшг бәәнә.
Әәмшгтә хальдврта гемм тархашгон төләд, үксн нохас-миисиг хотл балһсна хог-асхдг бәәрнд күргж хаяд, шатана. Иим керг өршәнһү седклтә керг биш. Тер бийнь, зерлг ноха-мис бәрдг шишлнг бәәрн уга цагт, зуг иим кевәр ноолдх кергтә болна. Нег үлү, нохаһас зуулһх әәмшг уга болх.
Санкун Кермн, Хулхачин Николай
