Приютное селәнд шин чонж секгдв
Приютное селәнд әрүн Вера, Надежда, Любовь болн эднә София экд нерәдгдсн шин часовнь-чонж байрин бәәдлд секгдж әрүслгдв. Энүнд Элстин болн Хальмгин архиепископ Зиновий түрүн мөргүл күцәв. Байрин мөргүлд танһчин толһач Алексей Орлов, района администрацин толһач Иван Кравченко, шин часовнь-чонж тосхсн улс, хазгудын элчнр болн Приютное селәнә православн әмтн ирж орлцв.
Шин часовня әрүслһнә керг ширә батлж авлһан шажна керг-үүлдврәс эклв. Энүнә хөөн Рижск архиепископ әрүн Иоанна цогц авч йовлһна шажна керг-үүлдвр болв. Чонж эргәд йовсна хөөн әрүн шажна үүлдәчин цогциг ширән сүүрт тәвв. Энүнә хөөн шинәс тосхгдсн чонжд Хальмгин болн Элстин архиепископ Зиновий түрүн ик мөргүл энд күцәв. Арзиепископ Зиновий темдглсәр, Приютненск района һазрт шин чонж секлһнд ик чинртә йовдл болжана.
Элстин болн Хальмгин архиепископ Зиновий келсәр, шин чонжиг әрүслһнә керг православн әмтиг әрүн шажн негдүлжәнә гисн герчлһн болжана.
Шин чонжд болсн мөргүлд Хальмг танһчин толһач Алексей Орлов, района администрацин толһач Иван Кравченко, шин часовнь-чонж тосхсн көдләчнр, хазгудын элчнр болн Приютное селән православн улс орлцв. Танһчин толһачин келсәр, шин часовнь-чонж әрүслһн района бәәдл-жирһлд ик чинртә йовдл болв. Өдгә цагт оюни зөөриг болн итклиг сергәж авх ик чинртә төр босхгджана.
Танһчин толһач Алексей Орловин келсәр, оюни жирһл мана танһчд делгрлт авчана. Ода Хальмгт хуучн авьяс-зангшал сергәгдж авчгджана. Шин чонж бәәрн улсин һара кегдв. Арһлач Игорь Усановд ик ханлт өргх кергтә. Эн күн эврәннь һаран чонж тосхв. Эннь йир сән керг болжана.
Господня Кирсин Воздвиженя чонжин һардач Александр Лешинд, арһлач Игорь Усановд, тосхлт шунмһа кевәр орлцсн селәнә улст күндлһнә һашгуд болн белгүд байрин бәәдлд бәрүлж өггдв. Приютное селәнд шин часовнь-чонж секлһнә байрла ирцүлж Элст балһснас Дары волхвов нертә әүрн шүтә авч ирв. Энүг Элстин епархийд әрүн Панавлин Афонск чонж белглсмн.
Приютненск района администрацин толач Иван Кравченко келсәр, материальн зөөрлә зерг оюни зөөр бас ик чинр зүүжәнә. Района күн болһн оюни босхмжд эврәннь тәвцән орулх зөвтә.
Байрин мөргүлд орлцсн цуг улст Пресвятая Богородицын бичкн шүтән белг гиж түгәж өггдв, тер мет Дары волхвов нерт әрүн шүтәнә зүрг әмтн түгәж өггдв.
Бевина Мергн, Мятежный Максим
