Политическ партьсин элчнриг цокж
Тадн танһчин зәнг шуд эфирт хәләжәнәт. һарцан цаарандан өгчәнәвидн. Ода талдан төрмдүин тускар. Хальмг танһчин олн-әмтнә хуралын депутатнрин кандидатнрин сунһлһна компань эклснәс авн политическ партьсин региональн әнгсин баннермуд суһлж авсн йовдлмуд темдглж бичгдв. Справедливая Россия партин региональн әнгин һардачин келсәр, давсн бембә өдр сөөһәр сунһлһна штабын гешүдиг цокж. Энүнә тускар партин региональн әнгсин элчнр болн зөв-йос харлһна органмудын көдләчнр цәәлһвр кев.
Танһчин МВД-н барин церглтин көдләч Аюша Бамбышеван келсәр, августын арвн доланд сөөһәр танһчин больницас МВД-н дежурн әнгд һурвн шавтсн кү больницд орулсна тускар эрлһн орж ирв. Ода полицин көдләчнр эн йовдлар шинжлт кежәнә, кү цоксн улсиг хәәжәнә.
Справедливая Россия партин региональн әнгин һардач Валерий Боваевин келсәр, утхта болн бит һартан авсн зурһан-долан күн һурвн кү цокв. Эдн баннер хәләж харжасмн. Теднә тоод энүнә отхн көвүнь бәәж. Эдниг больницд орулв. Көвүнднь эмчнр дөн болсн хөөн гер талан хәрв.
Хальмг үнн газетин журналистнрин илтксәр, шав авсн улс дунд МВД болн УФСИН-а көдләчнр бәәж. Единая Россия партин региональн әнгин сегләтрин негдгч дарук Саглр Бакинован келсәр, Единая Россия партин региональн әнг агитацин материалмуд эвдснә тускар зөв-йосна органмудт эрлһ орулж өгв. Иим йовдл Элст балһснд учрв. Тер мет Единая Россия партин баннер Лагань балһснд уга болж одв.
Эндр танһчин толһач Алексей Орлов сунһврт орлцжах хөрн һурвн партин элчнрт дуудвр кев. Энүнд иигж келгджәнә.
Күндтә танһчин улс! Хальмг танһчин толһач болад, Теегин йосна бичгин болн Әрәсән зака күцәлһнә гарант болснас иштә, сунһлһна комиссьмүдт, зөв-йосна органмудт зарһин органмудт агитацин кемд болн сунһврин өдр политическ партьс цуг зака күцәхинь бүрткж хәләх зөвтә. Танһчин әмтн дааврта болж, олн-зүсн хажһр керг-үүлдврт орлцлго, сунһврин өдр чик шүүвр кехин тускар танһчин цуг улст дуудвр кежәнәв.
Сентябрин нәәмнд сунһврин өдр олна әәмшг уга бәәдл теткхин төлә хальмг танһчин МВД-д өдр-сө уга телефон көдлх. Сунһврин өмн кедг агитацин халхар зака вэдсн йовдлмудын тускар танһчин әмтн зәнглж чадх.
