Школмудт сурһульчнр әдл нег хувц өмсх
Ода эн болн талдан төрмүдин тускар тодрхаһар. Сурһулин шин жил күртл дигтә арвн хойр өдр үлдв. Эн жиләс авн әрәсән цуг эрдм-сурһулин заведеньст сурһульчнр әдл нег хувц-хунр өмсх зөвтә. Эн төрәр зүткәтә күүндвр кегдв. Зуг сентябрин нег шинәс авн шин закан үүлдврт оржана. Школьн форм ямаран болхин тускар багшнр, эк-эцкнр болн бичкдүд шиидвр батлж авна. Тегәд чигн эн өдрмүдт Элст балһсна ательен көдләчнрин көдлмш немгдв. Элстихн эврәннь сурһульчнртан ямаран хувц-хунр хулдж авчахин тускар мана түрүн сюжетд келгджәнә.
Олн үртә эк Мария Кирпилевала мана үүдәгч баг Элст балһсна нег магазинд харһад күүндв. Дөрвдгч класст орх көвүндән пиджак болн киилг хулдж авх саната. Күүкнь болхла негдгч класст оржана. Дундлад комплект хулдж авхин төлә өрк-бүлин хазнас һурвн минһн арслнг һарх. Мария Кирпилеван келсәр, школд нег хувц-хунр өмсх неквр тәвхлә, ямаран хувц хулдж авхин тускар медгднә.
Мария Кирпилеван келсәр, негдвәр көвүд-күүкд талдан сурһульчнр ямаран хувц өмсснә тускар хоорндан күүндшго. Цуһар әдл хувц өмсхлә һундлта болшго.
Тер мет талдан чигн эк-эцкнр нег школьн хувц-хунрин тускар ухан-тоолврарн хувалцв. Иим хувцн сурһульчнриг диг-дарата болхд сән нилчән күргнә. Болв хамгин һол төрнь — зәрм көвүд-күүкд талдан үнтә хувц өмссн бичкдүдин өөр невчк эмәнә. Эннь психологин халхас сурһульчнрт бас ик чинр зүүнә.
Элстин хөрдгч школын директор Сергей Яманов хөрн тавн жилдән багшин халхар көдлжәнә. Йирн хорйдгч жилд школдж нег хувц-хунр уга кесн цагт көвүд-күүкд олн-зүсн өнгтә хувц өмсдг болв, зәрмснь дегд өнгтә киилг өмсдг билә, талдан көвүд-күүкд хуучн шуурха джинстаһар школд ирдг бәәсмн. Школын директорин т оолврар, нег хувц-хунр бийән сурһульч гиж тоолхд сән нилчән күргх, школын коллективин гешүн гид бийән тоолхд туста болх. Келхд, хотл балһсна хөрдгч школд эклц классин сурһульчнр нег хувц-хунр өмсжәнә.
Хөрдгч школын директор Сергей Ямановин келсәр, эн эрдм-сурһулин заведеньд олн зүсн категорин бичкдүд сурна. Тер тоод өнчн сурһульчнр бәәнә, инвалид көвүд-күүкд чигн сурна. Баһ тетквртә өрк-бүлмүдәс болн олн үртә өрк-бүләс күүкд ирж сурна. Хөрдгч школ әмтн олра бәәдг микрорайонд бәәнә. Школьн форм оурлһна төрәр тодрха күүндвр кегдсн билә.
Школьн хувц-хунр ямаран болхин тускар багшнр, эк-эцкнр болн сурһульчнр шиидвр авна. Хувцин янз, өнгинь олна хургт шүүж авна. Тер мет школьн хувц-хунрт школын темдг сурһульчнр зүүхлә бас сән болх.
Шин закана зокьялчнрин тоолврар, школд нег хувц өмссн сурһульчнр сурһльдан ик оньг тусхана, школд гүе медрл авхар шунна. Хувц уйлһна фабрикин генеральн директорин дарук Вячеслав Шевченкон келсәр, школд нег хувц-хунр өмсх невр һарснас хөөн, хувц уйх даалһвр олн болв. Иим школьн хувцн йосн сән эдәс уйяд, ке-сәәхн фурнитур немәд кехлә, эк-эцкнрт эннь таасгдна. Школд нег хувц-хунр кергтә аль угай? Энүнә тускар олн әмтн нег мөслгч шиидвр уга. Нег школьн хувц-хунр сурһулин заведеньд сән авьяст тохрхий аль угай? Эннь цаг давхла медгдх.
