Полицин көдләчнр мергнән шүүж авв
Танһчин МВД-н эрдмин белдврин цутхлнгд сән зангшалд тохрсн цергә зер-зевәс халһна спортивн марһан болв. Энүг Ар Кавказин регионд цергә даалһвран күцәжәһәд әмнәсн хацһсн танһчин дотр-дундын кергүдин органмудын көдләчнр Сергей Манкаевин болн Баснг Акугиновин санлд нерәдв. Хальмгин полицин көдләчнр региональн болн цугәрәсән марһаст оньдин орлцна.
Цергә бу-селмәс халһна сән зангшалд тохрсн санлын марһанд Элст балһсна болн танһчин райодын патрульн-харулын церглтин, шишлнг әнгсин көдләчнр болн Хальмгин МВД-н эрдмин белдврин цутхлнгин курсантнр орлцв. Ут-тоодан хөрн күн дииләчән йилһв. Өөрхн дәәлдәнә бу-селмәс Макаровин пистулас зөрн тавн метрт халһна марһан болв. Дөрлдәнд орлцач болһнд арвн сумн өггдв. Энүнә зуг һурвн сум белдврин сумн гиж өггдж.
Иим марһанд полицин көдләчнр дару-дарунь орлцна. Иим шүүвр болн даалһвр эднд эрк биш күцәх керг болж хүврв. МВД-н көдләчнрин цергә белдвр эднә болн гражданск улсин әәмшг уга бәәлһн өөрхн залһлдата.
МВД-н әнгин инспектор Мигмр Серкишевин келсәр, бу-селмәс халһан шүүвр эс өгсн полицин көдләчнр бу-селм олзлдг даалһвр күцәж чадшго. Тегәд хамгин түрүнд цергә даалһвран күцәхин төлә бу-селмәс тов хах зөвтә. Эннь полицин көдләчин әәмшг уга бәәлһнә болн талдан улсин әәмшг уга бәәлһнә төлә кергтә.
Зүткәтә марһана ашт күүкд күн диилвр бәрв. Негдгч болн һурвдгч орм цергә бу-селмәс халһна санлын марһанд МВД-н шишлнг әнгин көдләчнр эзлв. Хойрдгч орм Элст балһсна ППС-ин салу батальона көдләч эзлв. Дөрлдәнд орлцачнр цергх бу-селмәс халһна сән дамшлтан үзүлв.
МВД-н әнгин ахлачин үүл даажах Сергей Горбаневин келсәр, полицин көдләчнрин цергә белдврт иим марһан сән нилчән күргнә. Полицин көдләчнр әмнәсн хаһцсн улсин санл тодлулгч иим дөрлдәнд дурлж орлцна. Иим марһана йовдт эдн кергтә дамшлт хоршана. Тер мет мергжлтән өөдлүлнә. Призермудын тоод орхар зүткнә. Цергә белдврт бу-селмәс тов халһн ик чинр зүүжәнә.
Цергә даалһвр күцәж йовад әмнәсн хаһцсн улсин санлыг танһчин полицин көдләчнр әрүнәр хадһлжана. Хальмг танһчин МВД-н көдләчнрин спискд эдн мөнкинд бичгдв. Марһан байрин бәәдлд хаалһнд орлцсн Сергей Манкаевин болн Баснг Акугиновин элгн-саднь болн өөрхн улснь иим ик оньг тусхажах танһчин МВД-н һардачнрт болн полицин көдләчнрт ханлтан өргв.
Бевина Мергн, Хавтхна Анатолий
