Паспортн то-диг миграционн церглт күцәх

Селәдин администрац паспортн то-диг иргч жиләс авн кешго. Ода селәнә әмтн бәәсн һазртан темдглж бичгдхин төлә, иим тооһас һархин төлә района цутхлнг селәнд одх зөвтә. Иргч хойр минһн арвн дөрвдгч жилин январин нег шинәс авн государственн туслмж күрглһнә кергиг федеральн миграционн церглт күцәхмн.

Троицкое селәнә бәәрнкүүкд күн Елизавета Эрдниева эн саамд ик цаг үрәсн уга. Целинн района федеральн миграционн церглтин әнгд эндр әмтн баһ. Шин паспорт авсна хөөн, тер дарунь бәәсн һазртан темдглж бичгдв.

Елизавета Эрдниеван келсәр, шин паспорт авхинь арвн өдртән күләв. Энүг авчкад, бәәсн һазртан темдглж бичгдв. Цуг кергтә документ билә, тегәд дор ордмнь эүнг кехәр шиидв.

Давсн жиләс авн бәәсн һазрт әмт темдглж бичлһнә керг райодт федеральн миграционн церглтд оржана. Урднь селәдин әмтн бәәсн һазртан темдглж бичгдхин төлә эс гиж иим тооһас һархин төлә эврәннь муниципальн бүрдәцд оддг бәәсн болхла, иргч жилин январин нег шинәс авн эдн цуг эн төрмүдәр район цутхлнгд одад федеарльн миграционн церглтд иим төр халһж чадх.

ФМС-ин әнгин ахлач Сергей Шлыковин келсәр, әмтнд иим керг эвтә болшго, нег үлү района цутхлнг селәнәс хол бәәх әмтн түрх. Ода федеральн закаһар олн халхта цутхлнгуд райодт көдлжәнә. Ода элст балһснд, Көтчнр болн Хар Һазра райодт иим цутхлнгуд көдлжәнә.

Троицкое селәнә территориальн пунктын ахлач Андрей Дорджиевин келсәр, иим күнд бәәдл тоод авад, района миграционн церглтин көдләчнр селәнә улст телефоһар цәәлһвр өгчәнә. Тиигхлә селәнә улс мөнгән болн цаган әрвлж чадх.

Андрей Дорджиевин келсәр, ода олн документ орж иржәнә. Энүг хадһлад, кергтә зәнг авчана. Әрәсән закаһар паспорт һарһулж авх джокумент бәәнә. Ода көдлмш дала.

Ода хамгин икәр хол селәдин бәәрн улс үүмжәнә. Эднә ик зунь района цутхлнг селәнәс ик холд бәәнә. Тегәд хаалһин мөнгн кергтә, дала цаг үрнә. Федеарльн миграционн церглт иим керг күцәлһнә хамгин һол пункт болад, көдлмшән сәәнәр бүрдәж чадх гиж эдн нәәлжәнә.

Батан Санжирма, Бадмаран Владислав