Пальмовин нертә музейд гөрәснд нерәдгдсн кичәлмүд болжана

Эн өдрмүдт Хальмг танһчин Пальмовин нертә келн-улсин музейд гөрәснд нерәдгдсн кичәлмүд болжана. Өвәрц гөрәсн мана танһчин у-өргн теегин йоста кеерүл болн бахмж болжана. Музейд энүнд бүкл экспозиц нерәдгдв.

Экономическ колледжин негдгч курсын оют Иван Морозовин келсәр, сайган тускар соньн медрл авад, энүнә тускар дәкәд чигн өвәрц материал олж авх санан орв. Иван Морозовин келсәр, урднь гөрәсн утскар тас юм меддго бәәж. Ода түрүн болж зургудт эн өвәрц аһрус үзв. Ода әмд гөрәс үзх дурн күрв.өдгә цагт гөрәснә то дегд баһ болжахин тускар медж авв. Эдниг хадһлх кергтә. Энтн мана төрскн һазрин бахмж болжана.

Иим кичәлин йовудт теегин гөрәснә тускар оютнр медж авсн деерән, кичәлин хөөн баһчуд сайга хадһлхин төлә эврәннь тәвцән орулх седвәртә бәәнә. Иим шиидвр Жирһл Нимгирова болн энүнлә хамдан сурчах көвүд-күүкд авв. Музейин көдләчнриг баһчудын седвәр байрлулжана. Юнгад гихлә, иим кевәр дорас өсж йовх баһчудт оюни болн шагшавдын сурһмж өггджәнә. Музейин йиртмжин әнгин көдләч Мария Улюмджиева энд һучн жилдән көдлжәнә. Тегәд баһчудын иим сән седвәр энүнд көдлмштнь немр урмд өгчәнә. Пальмовин нертә келн-улсин музейин көдләч Мария Улюмджиеван келсәр, өдгә цагт энд олн экскурсь болна. Элст балһснд ирсн гиичнр эрк биш сайга үзүлхинь сурна. Хол һазрас ирсн әмтн өвәрц аһрусар йир икәр соньмсжана.хальмг танһчин әмтн болхла теегин бахмж болгч гөрәсиг ик кезәнәс авн үзәд угавидн гиж келнә. Мана танһчин теегин гөрәсәр соньмсжах улс дала гиж Улюмджиева келнә.

Сайган тускар музейд болсн кичәл йир соньн болв. Иим керг-үүлдврин һол күцлнь — дорас өсж йовх үйнрт эргндк йиртмж харлһна сурһмж өглһн болжана.

Ээнән Делгр, Хулхачин Николай