Олимпиадын күрл мөнгн медаль Хальмгин бөк шүүж авч чадв
Хальмгин бөк Олимпиадын күрл мөнгн медаль шүүж авч чадв. Хальмг танһчин спортын туужд Лондон балһснд болжах һучдгч Олимпиадт греко-римск янзар бөк бәрлдлһнд тәвн тавн килограммин чиннүрт Мингиян Семенов һурвдгч орм эзлв. Эн байрта зәнг Англяс өцклдүр сө арвн часла ирв. Мана республикин цуг әмтн тенкән уга гидгәр байрлв, Элст балһснд болхла кесг улс өрүн өрцәтл нәәрлв.
Элстин цутхлнгд ирсн цуг улсиг Лондон балһснас ирсн сән зәнг тенкән уга гидәр байрлулв. Цуг әмтн дегд икәр байрлж үүмв. Мана баһ наста бөк иим сән күцәмж бәрснлә элстихн болн гиичнр нег-негән йөрәв. Жирв хайсн ашт түрүн харһлтд Мингиян Семенов нарта-делкән чемпион, Пеникд болсн Олимпиадт цаһан мөнгн медаль шүүж авсн Азербайджана элч Ровшан Байрамовла ноолдв. Дегд ик дамшлт уга болад, дәкәд болхла иим чинртә дөрлдәнд түрүн болж орлцад, невчк үүмәд, Хальмгин бөк, хамр төрхд, шүүгдв. Цааранднь һурвдгч ормин төлә ноолдх арһ үлдв. Хальмг танһчин әмтн цуһар иргч ноолда күләв. Мана бөк эрк биш сән үзмж бәрх гиж болельшикүд нәәлжәлә. Семенов эднә нәәлвриг ханһав. Үлдсн цуг ноолдаг, тер тоод Америкин, Китдин болн Корейин бөкнрлә кесн дәрлдәг Мингиян шүүв. Энүнә өөр оньдин бәәсн энүнә икр Санл ахнь дүүһән дөннәд, немр чидл өгв.
Болв хамгин икәр Мингияна экнь Светлана Анджаевна эн өдр үүмәд, зовла. Гертән сууж чадлго, эврәннь Егор көвүтәһән болн Татьяна күүктәһән хол Комсомольский селәнәс Элст балһснд ирв.
Мингиян Семенов иим ик күцәмж бәрснь бас учрта. Бичкнәсн авн оньдин диилвр бәрхәр зүткдг билә. Ямаран чигн нертә спортсменла ноолдв чигн, теднәс әәлго, эрк биш шүүх күцл тәвдг бәәсмн. Энүнд түрүн тренерин ик тәвц бәәнә. Тренер Буда Замбаевин келсәр, Мингиян оньдин ик оньган өгч ноолдна, дангин бийән бүрткнә, бичкн цагасн авн ик болһамжта билә, өгсн селвгиг сәәнәр шингәж авсмн.
Элстин талвнгд олн улс кесгтән нәәрлж байрлв. Хальмг танһчин толһач Алексей Орлов олн улсин байр хувалцхар бас ирв. Олимпийск медаль шүүж авснла танһчин цуг улсиг йөрәһәд, Лондона Олимпиадын призерт гиигн маши белглв, Мингиян Семеновд өрәл сай арлснг мөрә өгхин тускар зәнглв. Танһчин толһач Алексей Орловин келсәр, күрл мөнгн медаль алтн медаль шүүж авснла әдл болжана. Иим зөргтә болн билгтә баһчуд мана танһчин нер холд туурулх.
Хотл балһсна цутхлнг талвнгд Мингиян Семеновин ноолдсн цуг дөрлдәг ик оньган өгч кииһән авлго хәләв гиж келх кергтә. Иим кевәр дөннснә ашт мана танһчин баһ наста бөк нертә спортсменмүдиг диилж чадв.
Хөрн хойр наста бөк Мингиян Семеновин сән күцәмж хальмгин спортын диилвр болв. Келхд, мана элч Әрәсән бөкнрин хамцу командын хамгин баһ наста спортсмен болж һарв. Ода энүнәс уйн наста бөкнр үлгүр авад, бас диилвр бәрхәр зүткхмн. Лондон балһснд шүүж авсн күрл мөнгн медаль греко-римск янзар бөк бәрлдлһнд хамьмгин баһчудт сән урмд өгх. Нег үлү, эн янзар мана элчнр сүл цагт сән үзмж бәрнә.
Бевина Мергн, Жамбин Дмитрий
