Хар Һазра района цуг әмтн Мингиян Семеновин медальин тускар сонсчкад, тенкән уга гидгәр байрлв
Хар Һазра района цуг әмтн иим байрта зәнг сонсчкад, тенкән уга гидгәр байрлв. Энд Мингиян өсәд-босад, спортын түрүн күцәмж бәрсмн. Ода эн һазра күн йоста баатр гиж тоолгдад, района әмтн ик бахмж кежәнә.
Мингиян Семеновиг төрскн селәнд күн болһн сәәнәр меднә. Ода болхла энүг цуг нарта-делкә меддг болв. Мана нертә спортсмен сурсн гимназьд энүнә школын багшнр цуглрв. Тер цагт Мингиян энд яһж сурч йовсн тускар, бичкндән ямаран бәәсн тускар тодлврмударн хувалцв. Хар Һазра РМО-н администрацин эрдм-сурһулин әнгин һардач Елизавета Лакован келсәр, Мингиян сурчасн цагт школын директор болж көдлж йовж. Мини һарт сурла, энүнд сурһмж өгләвидн. Ода икәр байрлад, бахмж кежәнәвидн. Мана нәәлвриг ханһав.
Школдан сәәнәр сурдг билә, көдлмшч көвүн, спортд дурта бәәсмн. Көгшдүди багшнриг йир күндлж йовла. ода күртл школдан оньдин ирнә. Бичкдүдлә харһад, селвг өгнә. Иим спортсмен Олимпиадт орлцснь йир күндтә. Мингиян йир цаһан седклтә һольшг зангта көвүн. Бөк бәрлдлһн энүнә жирһлин һол керг болв гиж багшнь келв.
Физкультурин багш Баирта Джиджаеван келсәр, бичкнәсн авн Мингиян бат зангта, чанһ-чиирг көвүн билә. Оньдин түрүн орм эзлх, талдан көвүдәс нүүрт һарх занг энүнд чидл болн ицл өгдг бәәж. Иим кевәр бичкн спортсмен болд мет батрсмн. Эн туст энүнд багшнр ик дөн күргв. Комсомольский селән Минигянд йир энкр һазр болжана. Хальмгин у-өргн тег, бичкн цагтан гүүж йовсн уульнцс болн хамждан бәәсн селәнә әмтн энүнд хамгин энкр улс болв. Физкультурин багш Баирта Джиджаеван келсәр, Мингиян йир дигтә-дарата сурһульч билә, талдан улст оньдин нөкд болх саната. Эрүл дорул бәәдл жирюлин сурһмжта көвүн, чик хаалһар йовж йовна. Ик гидгәр байрлжанав, эврәннь сурһульчарн ик бахмж кежәнәв гиж Баирта багш келнә.
Лондона Олимпиадын ноолдаг Хар һазрахн ик кезәнәс авн тенкән уга гидгәр күләв. Эннь бас учрта. Юнгад гихлә, эн района туужд түрүн болж баһ наста хальмгин бөк иим ик чинртә марһанд орлцв. Йирн йисдгч жилд йисн наста көвүн түрүн болж греко-римск янзар бөк бәрлдлһнә секцд ирсмн. Келхд, иим янзар бөк бәрлдхд йир жанһрта. Чидлән нөөлго дамшлт кеһәд, өдр-сө уга гилтә дурта көдлмшән кев. Тегәд чигн иим сән үзмж бәрж чадв. Эн жилин май сард Мингиян Семенов Әрәсән чемпиона нер зүүһәд, мана орн-нутгин хамцу командын тоод орв. Ода Красноярск балһсна университетд физическ культурин болн спортын факультетд сурчана. Лондон балһснд болжах Олимпийск нааднд орлцснь цуг нарта-делкән спортын халхар энүнә түрүн ишкдл болв. харм төрхд, мана танһчин билгтә болн нертә бөк Тул Львович Балдашинов тәвн жил хооран олимпийск командын кандидат билә, гу Олимпиадт орлцх зөв энүнд өгсн уга. Болв Хальмг танһчин һазрт билгтә бөк бәәхинь Мингиян Семенов батар герчлв.
Оньдин уралан, оньдин диилвр бәрх. Мана улан залата хальмгудын алдр дуудвр мана баһ наста бөкд ик урдм өгчәнә. Алдр жанһр дуулврас өгсн нериг билгтә бөк туурулж, баатрин чинр зүүв.
Бевина Мергн, Хулхачин Николай
